கடையின் முன்பு வாகனம் நிறுத்த வேண்டாம் எனக் கூறிய நபரை தாக்கிய சம்பவம் பரபரப்பை ஏற்படுத்தியுள்ளது
திருச்சிராப்பள்ளி மாவட்டத்தில் அமைந்துள்ள திருப்பராய்த்துறை கிராமத்தில் சனிக்கிழமை வாரச் சந்தை நடந்தது. இந்த சந்தையில் முருகன் என்பவர் எலுமிச்சை கடை வைத்து வியாபாரம் செய்து வந்துள்ளார். இந்நிலையில் முருகனின் கடைக்கு முன்பு கமலாநேரு மற்றும் அவரது மகள் ஜான்பிரியா ஆகியோர் மோட்டார் சைக்கிளை நிறுத்தியுள்ளார் . இதனைப் பார்த்ததும் கடையின் முன்பு மோட்டார் சைக்கிளை நிறுத்தினால் வியாபாரம் பாதிக்கும் என்று அவர்களிடம் முருகன் கூறியுள்ளார். அப்போது அவர்களுக்கிடையே வாக்குவாதம் ஏற்பட்டுள்ளது . இதுகுறித்து கமலாநேரு தனது மகனான அன்புக்கு தகவல் தெரிவித்துள்ளார்.
இதனையடுத்து அங்கு வந்த அன்பும் அவரது நண்பர்களும் இணைந்து முருகனையும் உதவியாளரான சரவணமூர்த்தி என்பவரையும் சரமாரியாக தாக்கியுள்ளனர். இதில் படுகாயமடைந்த இருவரையும் அருகில் உள்ளவர்கள் மீட்டு தனியார் மருத்துவமனையில் சிகிச்சைக்காக அனுமதித்துள்ளனர். இதுகுறித்து முருகன் காவல் நிலையத்தில் புகார் அளித்துள்ளார். இந்த பேரில் வழக்கு பதிவு செய்த காவல்துறையினர் தகராறில் ஈடுபட்ட 5 பேரை கைது செய்து விசாரணை நடத்தி வருகின்றனர்.