கடந்த மாதம் ஸ்பேஸ் X மற்றும் டெஸ்லா நிறுவனத்தின் தலைவர் எலான்மஸ்க் டுவிட்டரை முழுவதுமாக கையப்படுத்தினார். மேலும் டுவிட்டரை வாங்கிய சிலமணி நேரங்களிலேயே, டுவிட்டரின் இதுநாள் வரை தலைமை செயல் அதிகாரியாக இருந்த இந்திய வம்சாவளியைச் சேர்ந்த பராக் அகர்வால் மற்றும் சில முக்கிய அதிகாரிகளை பொறுப்பிலிருந்து நீக்கம் செய்தார். அவ்வாறு இந்திய வம்சாவளியைச் சேர்ந்த பராக் அகர்வாலை டுவிட்டரில் இருந்து நீக்கிய எலான்மஸ்க், தற்போது மீண்டும் ஶ்ரீராம் கிருஷ்ணன் என்ற இந்தியரின் உதவியை நாடி இருக்கிறார். சென்னையில் பிறந்த இந்திய- அமெரிக்க பொறியாளரான ஶ்ரீராம் கிருஷ்ணன், தற்போது எலான்மஸ்க்கின் முக்கிய குழுவில் உறுப்பினராக இருக்கிறார்.
இத்தகவலை ஶ்ரீராம் கிருஷ்ணன் அவரது டுவிட்டர் கணக்கு தகவலில் உறுதிப்படுத்தி இருக்கிறார். இதில் ஸ்ரீராம் சென்னையில் நடுத்தர குடும்பத்தை சேர்ந்தவர் ஆவார். இவரது தந்தை இன்சூரன்ஸ் நிறுவனத்தில் பணியாற்றி வந்திருக்கிறார். முன்னதாக ஸ்ரீராம் கிருஷ்ணன் 2001-2005 வரை சென்னையிலுள்ள எஸ்ஆர்எம் கல்லூரியில் பி.டெக் பயின்றார். அதன்பின் 2005 -2011 வரை மைக்ரோசாப்ட் நிறுவனத்தில் பணிபுரிந்த ஸ்ரீராம் கிருஷ்ணன், பின் அமெரிக்காவின் சியாட்டிலுக்கு குடிபெயர்ந்தார். அதனை தொடர்ந்து ஸ்ரீராம் 2013-2016-க்கு இடையில் மெட்டாவில் (பேஸ்புக்) பணியாற்றியதாக அவரது லிங்க்டின் சுயக்குறிப்பில் தெரிவிக்கப்பட்டுள்ளது.
பின் 2017 -2019 வரை டுவிட்டரில் பணிபுரிந்தார். டுவிட்டரில் நுகர்வோர் குழுக்களை வழி நடத்திய ஸ்ரீராம், அந்நிறுவனத்தில் பயனர் அனுபவம், தேடல், கண்டுபிடிப்பு மற்றும் பார்வையாளர்களின் வளர்ச்சி போன்ற பிரிவுகளைக் கையாண்டார். ஸ்ரீராம் கிருஷ்ணன், பணியாற்றும் நிறுவனத்தில் a16z என்று அழைக்கப்படும் “Andreesen Horowitz”ல் பங்குதாரர் ஆவார். இந்த Andreesen Horowitz வாயிலாக பல நுகர்வோர் ஸ்டார்ட் அப்களில் அவர் முதலீடு செய்துள்ளார். அத்துடன் பிட்ஸ்கி, ஹாபின், பாலிவொர்க் ஆகிய நிறுவனங்களின் வாரியங்களில் ஸ்ரீராம் உறுப்பினராக இருக்கிறார்.
மேலும் ஸ்ரீராம் கிருஷ்ணன் a16zல் சேருவதற்கு முன் டுவிட்டர் உள்பட பல பெரிய நிறுவனங்களில் பணிபுரிந்துள்ளார். இதனிடையில் ஸ்ரீராமும் அவரது மனைவி ஆர்த்தியும் சேர்ந்து “தி குட் டைம் ஷோ” எனும் யூடியூப் சேனலை துவங்கி நடத்தி வந்தனர். 2020ம் வருடம் பிப்ரவரியில் இந்த தம்பதி எலான்மஸ்கை ஒரு நள்ளிரவு கேளிக்கை நிகழ்ச்சிக்கு அழைத்து இருந்ததாகவும், அந்த குறுஞ்செய்தியின் அடிப்படையில் அதில் பங்கேற்க எலான்மஸ்க் ஒப்புக் கொண்டதாகவும் ஸ்ரீராம் தெரிவித்திருந்தார். பொறியியலாளரான ஸ்ரீராம், டுவிட்டர் நிறுவனத்துக்காக எலான் மஸ்க்குடன் ஒத்துழைப்பதாக தனது பதிவில் தெரிவித்து இருக்கிறார்.மேலும். டுவிட்டர் உலகில் பெரும் தாக்கத்தினை ஏற்படுத்துகிறது. அது எலான்மஸ்க் தலைமையில் தான் நடக்கும்” என தெரிவித்து உள்ளார். அதே நேரம் மற்றொரு டுவிட்டில் தாம் இன்னும் தற்போதைய நிறுவனத்தில் பணிபுரிந்து வருவதாக ஸ்ரீராம் குறிப்பிட்டுள்ளார்.