ஹோட்டல் ஊழியர் தூக்கிட்டு தற்கொலை செய்து கொண்ட சம்பவம் சோகத்தை ஏற்படுத்தியுள்ளது.
சென்னை மாவட்டத்திலுள்ள மாம்பலம் நாகாத்தம்மன் கோவில் தெருவில் காந்தி ராஜா என்பவர் வசித்து வந்துள்ளார். இவர் வேளச்சேரி பகுதியில் இருக்கும் ஓட்டலில் ஊழியராக பணிபுரிந்து வந்துள்ளார். கடந்த சில ஆண்டுகளாக காந்திராஜா ஆன்லைன் சூதாட்டத்தில் ஈடுபட்ட 2 லட்ச ரூபாய் வரை இழந்ததாக கூறப்படுகிறது. இதனால் மன உளைச்சலில் இருந்த காந்திராஜா அந்த வீட்டில் தூக்கிட்டு தற்கொலை செய்துள்ளார். இதனையடுத்து தண்ணீர் கேன் போட சென்ற நபர் நீண்ட நேரமாக கதவை தட்டியும் காந்திராஜா கதவை திறக்கவில்லை.
இதனால் அவர் ஜன்னல் வழியாக எட்டி பார்த்த போது காந்திராஜா சடலமாக தொங்குவதை கண்டு அதிர்ச்சி அடைந்து உடனடியாக காவல்துறையினருக்கு தகவல் தெரிவித்துள்ளார். அந்த தகவலின்படி சம்பவ இடத்திற்கு விரைந்து சென்ற காவல்துறையினர் காந்திராஜாவின் சடலத்தை கைப்பற்றி அரசு மருத்துவமனைக்கு பிரேத பரிசோதனைக்காக அனுப்பி வைத்தனர். மேலும் இதுகுறித்து வழக்குப்பதிவு செய்த காவல்துறையினர் தீவிர விசாரணை மேற்கொண்டு வருகின்றனர்.