தமிழகத்தில் ஏப்ரல் 6-ஆம் தேதி சட்டமன்ற தேர்தல் நடைபெற உள்ளது. அதனால் அனைத்து கட்சிகளும் தீவிர தேர்தல் பிரசாரத்தில் ஈடுபட்டு வருவதால் தேர்தல் களம் சூடு பிடிக்க தொடங்கியுள்ளது. ஒவ்வொரு கட்சியினரும் தங்கள் எதிர்கட்சியினரை கடுமையாக விமர்சித்து தேர்தல் பிரசாரம் செய்து வருகிறார்கள். அதிலும் குறிப்பாக அதிமுக மற்றும் திமுக இடையே கடும் மோதல் போக்கு நிலவி வருகிறது. இதற்கு மத்தியில் சட்டமன்ற தேர்தலில் போட்டியிடும் வேட்பாளர்கள் பட்டியலை ஒவ்வொரு கட்சியும் வெளியிட்டு வருகிறது.
மறுபக்கம் மக்களைக் கவர அனைத்து கட்சியினரும் மக்களிடம் நேரடி தேர்தல் பிரசாரத்தில் களமிறங்கியுள்ளனர். இதையடுத்து தேர்தல் பரப்புரையில் பேசிய முதல்வர் பழனிசாமி, ஒரே மேடையில் விவாதிக்க வருமாறு ஸ்டாலினுக்கு நான் சவால் விடுத்தும் வரவில்லை. அதிமுக கூட்டணியை விமர்சிக்கும் ஸ்டாலினுக்கு மக்கள் பாடம் புகட்ட வேண்டும். என்னையும் கூட்டணி தலைவர்களையும் விமர்சிப்பதையே ஸ்டாலின் வழக்கமாக கொண்டுள்ளார் என்று விமர்சனம் செய்துள்ளார்.