மோட்டார் சைக்கிள் மீது லாரி மோதிய விபத்தில் 2 பேர் பலியான நிலையில், 3 பேர் படுகாயம் அடைந்தனர்.
அரியலூர் மாவட்டத்தில் உள்ள இருங்காலக்குறிச்சியில் வசிக்கும் வாலிபர், ஒரு பெண் உள்பட 5 பேர் ஒரே மோட்டார் சைக்கிளில் கடலூர் மாவட்டத்தில் உள்ள நெய்வாசலில் இருக்கும் கோவிலுக்கு சாமி கும்பிடுவதற்காக சென்றுள்ளனர். இந்நிலையில் கொடிக்குளம் பேருந்து நிலையம் அருகே சென்று கொண்டிருந்தபோது எதிரே வேகமாக வந்த லாரி மோட்டார் சைக்கிள் மீது பயங்கரமாக மோதியது. இந்த விபத்தில் படுகாயமடைந்த வாலிபரும், அந்த பெண்ணும் சம்பவ இடத்திலேயே பரிதாபமாக இறந்துவிட்டனர்.
இதனை அடுத்து மற்றொரு பெண் மற்றும் இரண்டு சிறுவர்களை அக்கம் பக்கத்தினர் மீட்டு திட்டக்குடி அரசு மருத்துவமனைக்கு சிகிச்சைக்காக அனுப்பி வைத்தனர். அங்கு அவர்களுக்கு தீவிர சிகிச்சை அளிக்கப்பட்டு வருகிறது. இதுகுறித்து அறிந்த போலீசார் சம்பவ இடத்திற்கு விரைந்து சென்று இறந்தவர்களின் உடலை மீட்டு அரசு மருத்துவமனைக்கு பிரேத பரிசோதனைக்காக அனுப்பி வைத்தனர். இதுகுறித்து வழக்கு பதிவு செய்த போலீசார் இறந்தவர்கள் யார்? விபத்தை ஏற்படுத்திய வாகன ஓட்டுனர் யார்? என்பது குறித்து விசாரணை நடத்தி வருகின்றனர்.