ஓடும் மோட்டார் சைக்கிளில் திடீரென தீப்பிடித்து எரிந்த சம்பவம் பெரும் பரபரப்பை ஏற்படுத்தியுள்ளது.
கள்ளக்குறிச்சி மாவட்டத்தில் உள்ள கல்வராயன்மலை அருகே நடுத்தொரடிப்பட்டு கிராமத்தில் சக்திவேல் என்பவர் வசித்து வருகிறார். இவர் வெள்ளிமலையில் இருந்து பெட்ரோல் வாங்கிவிட்டு நடுத்தொடரிப்பட்டு கிராமத்துக்கு மோட்டார் சைக்கிளில் திரும்பி வந்துள்ளார். அப்போது திடீரென மோட்டார் சைக்கிள் தீப்பிடித்து எரிந்துள்ளது. இந்த விபத்தில் சக்திவேலின் மீதும் தீ பரவியது.
இதைப்பார்த்து அதிர்ச்சியடைந்த அக்கம்பக்கத்தினர் சக்திவேலை மீட்டு சிகிச்சைக்காக மாவடிப்பட்டு அரசு மருத்துவமனையில் சேர்த்தனர். அதன்பின் மேல் சிகிச்சைக்காக சக்திவேல் கள்ளக்குறிச்சி அரசு மருத்துவமனைக்கு அனுப்பி வைக்கப்பட்டுள்ளார். அங்கு சக்திவேலுக்கு தீவிர சிகிச்சை அளிக்கப்பட்டு வருகிறது. இதுகுறித்து கரியாலூர் காவல்நிலையத்தில் புகார் அளிக்கப்பட்டுள்ளது. அந்த புகாரின்படி வழக்குப்பதிவு செய்த காவல்துறையினர் விசாரணை மேற்கொண்டு வருகின்றனர்.