நீலகிரி மாவட்டத்தில் கடுமையான குளிர் நிலவுவதால் சுற்றுலா பயணிகள் மிகவும் சிரமப்படுகின்றனர்.
நீலகிரி மாவட்டத்தில் தற்போது வடகிழக்கு பருவமழை பெய்து வருகிறது. இதனால் நேற்று ஊட்டி மற்றும் சுற்றுவட்டார பகுதிகளில் காலையிலிருந்து வானம் மேகமூட்டத்துடன் காணப்பட்ட நிலையில் பலத்த காற்று வீசியது. இதனால் அப்பகுதிகளில் கடுங்குளிர் நிலவியுள்ளது.இதன் காரணமாக ஊட்டி அரசு தாவரவியல் பூங்காவிற்கு வரும் சுற்றுலா பயணிகள் கம்பளி ஆடைகள், தொப்பி அணிந்து பூக்களை கண்டு ரசித்துள்ளனர்.
ஆனால் கடுங்குளிர் காரணமாக சுற்றுலா பயணிகளால் நீண்ட நேரம் பூங்காவை கண்டு ரசிக்க முடியவில்லை என்று வருத்தத்துடன் திரும்பிச் சென்றுள்ளனர். மேலும் ஊட்டி கோத்தகிரி, குன்னூர் சாலைகளில் கடும் பனி மூட்டம் நிலவியது. இதனால் அந்த வழியாக செல்லும் வாகனஓட்டிகள் முன்னெச்சரிக்கை நடவடிக்கையாக முகப்பு விளக்குகளை எரிய விட்டபடி சென்றுள்ளனர். இந்நிலையில் ஊட்டியில் மதியத்திற்கு மேல் சாரல் மழை பெய்த நிலையில் பொதுமக்கள் குடைபிடித்து நடந்து சென்றுள்ளனர். மேலும் கடும் குளிரின் காரணமாக முக்கிய சாலைகளில் பொதுமக்கள் நடமாட்டம் குறைவாக காணப்பட்டிருக்கிறது.