இருசக்கர வாகனம் கட்டுபாட்டை இழந்து தடுப்புசுவரில் மோதியலில் 2 மாணவர்கள் உயிரிழந்த சம்பவம் அப்பகுதியில் சோகத்தை ஏற்படுத்தியுள்ளது.
தேனி மாவட்டம் சின்னமனூரை அடுத்துள்ள அழகாபுரி பகுதியில் அபிமணி என்ற இளைஞன் வசித்து வந்துள்ளார். இவர் கோட்டூரில் உள்ள அரசு பாலிடெக்னிக் கல்லூரியில் 3ஆம் ஆண்டு படித்து வருகிறார். இந்நிலையில் இவரும், அதே பகுதியை சேர்ந்த நாகராஜ் என்பவரும் இணைந்து இருசக்கர வாகனத்தில் கல்லூரிக்கு செல்வது வழக்கம். அதன்படி சம்பவத்தன்று அபிமணி மற்றும் நாகராஜ் கல்லூரிக்கு சென்றுவிட்டு மீண்டும் இருசக்கர வாகனத்தில் வீட்டிற்கு சென்று கொண்டிருந்துள்ளனர். அப்போது அழகாபுரி விலக்கு அருகே வைத்து இருசக்கர வாகனம் கட்டுப்பாட்டை இழந்து சாலையோரத்தில் இருந்த தடுப்பு சுவரில் மோதியுள்ளது.
இந்த கோர விபத்தில் அபிமணி மற்றும் நாகராஜ் இருவருக்கும் பலத்தகாயம் ஏற்பட்டுள்ளது. இதனை பார்த்து அதிர்ச்சியடைந்த அப்பகுதியினர் உடனடியாக இருவரையும் மீட்டு தேனி அரசு மருத்துவமனைக்கு அனுப்பி வைத்துள்ளனர். ஆனால் செல்லும் வழியிலேயே துரதிஷ்டவசமாக இரண்டு இளைஞர்களும் பரிதாபமாக உயிரிழந்துள்ளனர். இதுகுறித்து தகவலறிந்த ஓடைப்பட்டி காவல்துறையினர் இளைஞர்களின் உடலை மீட்டு பிரேத பரிசோதனைக்காக மருத்துவமனைக்கு அனுப்பி வைத்துள்ளனர். மேலும் இச்சம்பவம் குறித்து வழக்கு பதிவு செய்து விசாரணை மேற்கொண்டு வருகின்றனர்.