தமிழகத்தில் வடகிழக்கு பருவமழை தீவிரமடைந்ததை தொடர்ந்து பல்வேறு மாவட்டங்களில் பரவலாக மழை பெய்து வருகிறது. அதனால் பள்ளி கல்லூரிகளுக்கும் விடுமுறை அளிக்கப்பட்டது. இந்நிலையில் கடந்த வாரங்களில் சற்று மழை குறைந்த நிலையில், தற்போது மேற்கு வங்க கடல் பகுதியில் நிலவும் வளிமண்டல மேலடுக்கு சுழற்சி காரணமாக மீண்டும் வடகிழக்கு பருவமழை தீவிரம் எடுத்துள்ளது. அதனால் தமிழகம் முழுவதும் இடி மின்னலுடன் கூடிய பலத்த மழை பெய்து வருகிறது. நேற்று முன்தினம் இரவு பெய்ய தொடங்கிய மழை இடைவிடாது பெய்து கொண்டிருக்கிறது.
அதனால் சாலைகளில் வெள்ளம் பெருக்கெடுத்து ஓடுகிறது. கனமழை காரணமாக தமிழகத்திற்கு ரெட் அலர்ட் எச்சரிக்கையும் விடுக்கப்பட்டுள்ளது. மேலும் தமிழகத்தில் நான்கு நாட்களுக்கு கனமழை தொடரும் என வானிலை ஆய்வு மையம் தெரிவித்துள்ளது. இதையடுத்து கனமழை காரணமாக தமிழகத்தில் 23 மாவட்டங்களில் இன்று பள்ளி கல்லூரிகளுக்கு விடுமுறை அறிவிக்கப்பட்டுள்ளது. இதனைத் தொடர்ந்து திருச்சி மாவட்டத்தில் உள்ள தேசிய கல்லூரி அருகே மாநகராட்சிக்கு சொந்தமான இடத்தை தனியார் ஆக்கிரமித்ததால் கல்லூரி முழுவதும் வெள்ளம் சூழ்ந்துள்ளது. அதனால் தேசிய கல்லூரிக்கு 15 நாட்கள் விடுமுறை அறிவிக்கப்பட்டுள்ளது.