சீன கம்யூனிஸ்ட் கட்சியில் சேர விருப்பம் உள்ளதாக திரைப்படங்களில் தனது சாகசத் திறமையினால் உலகம் நெடுகிலும் அதிக அளவில் ரசிகர்களை வென்றுள்ள நடிகர் ஜாக்கி சான் தெரிவித்துள்ளார். 67 வயதாகும் ஜாக்கி சான் சீனாவின் கட்டுப்பாட்டில் உள்ள ஹாங்காங்கில் வசித்து வருகிறார். ஹாங்காங்கில் ஆதிக்கம் செலுத்த, அங்கு தேசிய பாதுகாப்பு சட்டத்தை சீன அரசு நடைமுறைபடுத்தியது. இதை எதித்து, ஹாங்காங் மக்கள் தொடர் போராட்டங்களில் ஈடுபட்டு வருகின்றனர். இந்த விவகாரத்தில், சீனாவுக்கு ஆதரவாக, நடிகர் ஜாக்கி சான் கடந்த ஆண்டு கருத்து தெரிவித்தார்.
இது குறித்து அவர், “கடந்த சில ஆண்டுகளில் சீனா மிக வேகமாக முன்னேறி வருகிறது. இதை பல நாடுகளுக்கு செல்லும்போது நேரடியாக உணர்ந்து உள்ளேன். சீன குடிமகனாக இருப்பதில் பெருமை அடைகிறேன். ஐந்து நட்சத்திரங்களை உடைய நம் சிவப்பு கொடிக்கு, உலகம் முழுதும் மரியாதை உள்ளது.சீன கம்யூனிஸ்ட் கட்சி கொடுத்த வாக்குறுதிகளை மிக குறைந்த காலத்திலேயே நிறைவேற்றி வருகிறது. எனவே, அக்கட்சியில் உறுப்பினராக இணைய ஆர்வமாக இருக்கிறேன்” என்று கூறியுள்ளார்.