தமிழகத்தில் கொரோனா அச்சுறுத்தல் காரணமாக கடந்த ஆண்டு மார்ச் மாதம் ஊரடங்கு அமல்படுத்தப்பட்டது. அப்போதைய மாநிலம் முழுவதும் உள்ள பள்ளி மற்றும் கல்லூரிகள் அனைத்தும் மூடப்பட்டன. அதனால் மாணவர்கள் அனைவருக்கும் ஆன்லைன் மூலமாக வகுப்புகள் நடத்தப்பட்டு வந்தது. அதன்பிறகு கொரோனா பாதிப்பு சற்று குறைந்த நிலையில், 9 முதல் 12 ஆம் வகுப்பு மாணவர்களுக்கு பள்ளிகள் திறக்கப்பட்டு வகுப்புகள் நடத்தப்பட்டு வந்தன.
ஆனால் பள்ளிகள் திறந்த சில நாட்களிலேயே பள்ளி மாணவர்களுக்கு கொரோனா பாதிப்பு உறுதி செய்யப்பட்டது. அதுமட்டுமன்றி தமிழகத்தில் கடந்த 2 வாரமாக கொரோனா பாதிப்பு புதிய உச்சத்தை தொட்டுள்ளது. அதனால் மாணவர்களின் நலன் கருதி 9 முதல் 11 ஆம் வகுப்பு மாணவர்களுக்கு தேர்வு இல்லாமல் ஆல் பாஸ் செய்யப்படுவார்கள் என்று அறிவிக்கப்பட்டு விடுமுறை விடுக்கப்பட்டுள்ளது. அதனைப் போலவே மாநிலம் முழுவதும் உள்ள கல்லூரிகளுக்கும் அரசு விடுமுறை அளித்துள்ளது.
இந்நிலையில் நாளுக்கு நாள் கொரோனா பாதிப்பு அதிகரித்து கொண்டே வருவதால் புதுச்சேரியில் கல்லூரி தேர்வுகள் அனைத்தும் தேதி குறிப்பிடப்படாமல் ஒத்தி வைக்கப்படுவதாக மத்திய பல்கலைகழகம் அறிவித்துள்ளது. மத்திய பல்கலைக் கழகத்திற்கு உட்பட்ட 90 இணைப்புக் கல்லூரிகளில் பல்வேறு பாடப்பிரிவுகளுக்கு 19ஆம் தேதி முதல் தேர்வுகள் தொடங்க இருந்த நிலையில், கொரோனா தீவிரமாக பரவி வருவதை அடுத்து தேர்வுகள் அனைத்தும் ஒத்தி வைக்கப்படுகின்றன. இதில் மருத்துவம், பொறியியல் மற்றும் சட்டப் படிப்புகளுக்கான தேர்வுகளும் அடங்கும்.