திருச்சி சமயபுரம் டோல்கேட் அருகேயுள்ள கூத்தூரில் செயல்படும் தனியார் பாலிடெக்னிக் கல்லூரி பேருந்து இன்று காலை ஸ்ரீரங்கத்திலிருந்து 50 மாணவர்களுடன் கூத்தூர் நோக்கி சென்று கொண்டிருந்தது. அப்போது பேருந்தை கண்ணன் என்பவர் ஓட்டிவந்தார். இதையடுத்து பேருந்து ஸ்ரீரங்கம் திருவானைக்காவல் பாலத்தில் இறங்கும் போது அதன் வேகம் அதிகமாக இருந்துள்ளது. இந்நிலையில் வயது முதிர்வு காரணமாக ஓட்டுநர் கண்ணனால் பேருந்து ஓட்டத்தை கட்டுப்படுத்த முடியவில்லை.
பின் கட்டுப்பாட்டை இழந்த பேருந்து சாலையின் ஓரத்தில் இருந்த ஆட்டோ, இருசக்கர வாகனங்கள் மீது மோதியதுடன், எதிரே வந்த மற்றொரு தனியார் பள்ளி வேன் மீது நேருக்குநேர் மோதி விபத்துக்குள்ளானது. இதனால் 2 மாணவி, ஒரு மாணவன் மற்றும் பொதுமக்கள் என மொத்தம் 10க்கும் மேற்பட்டோர் காயமடைந்தனர். அதனை தொடர்ந்து காயமடைந்த அனைவரும் ஸ்ரீரங்கம் அரசு மருத்துவமனையில் அனுமதிக்கப்பட்டு இருக்கின்றனர். இவ்விபத்தால் திருவானைக்காவல் ஸ்ரீரங்கம் பிரதான சாலையில் சுமார் அரை மணிநேரம் போக்குவரத்து சேவை பாதிக்கப்பட்டது. இது தொடர்பாக ஸ்ரீரங்கம் காவல்துறையினர் விசாரணை மேற்கொண்டு வருகின்றனர்.