காதலுக்கு எதிர்ப்பு தெரிவித்து, மகள் வாயில் விஷத்தை ஊற்றி கொல்ல முயன்ற தந்தையை காவல்துறையினர் கைது செய்துள்ளனர்.
திண்டுக்கல் மாவட்டம், கொடைக்கானல் ஆனந்தகிரி 1வது தெருவில் வசித்து வருபவர் எபினேசர் சாமுவேல் ராஜா(49). இவருடைய மனைவி ஜூலியர் தங்கம்(46). இவர்களுடைய மகள் பி.இ பட்டதாரியான 22 வயதுடைய ஜெர்ஷாஜெர்லி. இவர் தூத்துக்குடியில் இருக்கின்ற ஒரு தனியார் பயிற்சி மையத்தில் தங்கி இருந்து யு.பி.எஸ்.சி தேர்வுக்கு படித்து வந்துள்ளார். அப்போது அதே பயிற்சி மையத்தில் படித்த தூத்துக்குடி அகரம் பகுதியில் வசித்த வாலிபர் ஒருவருடன் ஜெர்ஷாஜெர்லிக்கு காதல் வந்துள்ளது.
இந்நிலையில் ஜெர்ஷாஜெர்லிக்கு அவருடைய பெற்றோர் வேறு இடத்தில் மாப்பிள்ளை பார்த்தார்கள். அப்போது ஜெர்ஷாஜெர்லி தான் ஒருவரை காதலிப்பதாகவும், அவரை திருமணம் செய்து கொள்வதாகவும் தெரிவித்தார். இதற்கிடையில் காதலனின் குடும்பத்தினர் ஜெர்ஷாஜெர்லி பெற்றோரிடம் வந்து பெண் கேட்டார்கள். அப்போது ஆறு மாதம் கழித்து திருமணம் செய்து வைப்பதாக தெரிவித்தார்கள். இந்நிலையில் கடந்த 29ஆம் தேதி மாணவியின் தந்தை, தாய், உறவினர் வினோத் ராஜா ஆகியோர் காதலுக்கு எதிர்ப்பு தெரிவித்து ஜெர்ஷாஜெர்லியிடம் தாங்கள் பார்த்த மாப்பிள்ளையை திருமணம் செய்து கொள்ள வேண்டும் என்று கட்டாயப் படுத்தினார்கள்.
இதற்கு அவர் மறுப்பு தெரிவித்ததால் ஜெர்ஷாஜெர்லியை சரமாரியாக தாக்கி தாங்கள் வைத்திருந்த விஷத்தை வாயில் ஊற்றி மூன்று பேரும் அவரை கொல்ல முயற்சித்தார்கள். இந்த சத்தத்தை கேட்டு அருகில் இருந்தவர்கள் ஜெர்ஷாஜெர்லியை மீட்டு சிகிச்சைக்காக கொடைக்கானல் அரசு ஆஸ்பத்திரியில் கொண்டு சேர்ந்தார்கள். அதன்பின் மேல் சிகிச்சைக்காக வத்தலக்குண்டுவில் இருக்கின்ற தனியார் ஆஸ்பத்திரியில் சேர்க்கப்பட்டார். அங்கு அவருக்கு தீவிர சிகிச்சை அளிக்கப்படுகிறது.
இது குறித்து ஜெர்ஷாஜெர்லி கொடைக்கானல் காவல் நிலையத்தில் புகார் அளித்தார். இப்புகாரின்பேரில் இன்ஸ்பெக்டர் பாஸ்டின் தினகரன் வழக்குப் பதிந்து எபினேசர் சாமுவேல் ராஜை கைது செய்துள்ளனர். மேலும் இந்த வழக்கில் தொடர்புடைய ஜூலியட், வினோத் ராஜா ஆகியோரை வலைவீசி தேடி வருகிறார்கள். இந்த சம்பவம் குறித்து மாவட்ட போலீஸ் சூப்பிரண்டு அருண்கபிலன் கொடைக்கானலில் தீவிர விசாரணை மேற்கொண்டு வருகின்றார்.