உடலில் காயங்களுடன் வாலிபர் சடலமாக மீட்கப்பட்ட சம்பவம் பரபரப்பை ஏற்படுத்தியுள்ளது.
சென்னை மாவட்டத்தில் உள்ள திருவொற்றியூர் குப்பம் துலுக்கானத்தம்மன் கோவில் தெருவில் உதயகுமார் என்பவர் வசித்து வந்துள்ளார். நேற்று அதிகாலை திருவொற்றியூரில் இருந்து எண்ணூர் செல்லும் கடற்கரை சாலையோர சர்வீஸ் சாலையில் உதயகுமார் சடலமாக கிடந்ததை பார்த்த பொதுமக்கள் போலீசருக்கு தகவல் தெரிவித்தனர். அதன்படி சம்பவ இடத்திற்கு விரைந்து சென்ற போலீசார் வாலிபரின் உடலை மீட்டு அரசு மருத்துவமனைக்கு பிரேத பரிசோதனைக்காக அனுப்பி வைத்தனர்.
இதுகுறித்து வழக்கு பதிவு செய்த போலீசார் நடத்திய விசாரணையில் நேற்று முன்தினம் இரவு நேரத்தில் ஊர் திருவிழாவை முன்னிட்டு உதயகுமார் தனது நண்பரான காமேஷ் என்பவரின் மோட்டார் சைக்கிளை வாங்கி கொண்டு சென்றுள்ளார். உதயகுமாரின் சடலம் கிடந்த இடத்தில் இருந்து சுமார் 150 மீட்டர் தொலைவில் மோட்டார் சைக்கிள் கிடந்தது. அவரது தலை மற்றும் கைகளில் ரத்த காயங்கள் இருந்தது. எனவே விபத்தில் சிக்கி உதயகுமார் உயிரிழந்தாரா? அல்லது யாரேனும் அடித்து கொலை செய்தனரா? என்பது குறித்து போலீசார் விசாரணை நடத்தி வருகின்றனர்.