கால்வாயில் மிதந்து வந்த ஆண் சடலம் …!!

மதுரை அருகே கள்ளந்திரி பாசன வாய்க்காலில் திடீரென ஒரு ஆண் சடலம் மிதந்தபடி வந்ததால் அங்கு குளித்துக் கொண்டிருந்த பலரும் அதிர்ச்சியடைந்தனர்.

மதுரை மாவட்டத்தில் ஒரு போக விவசாய பாசனத்திற்காக பெரியார் கால்வாய் மற்றும் பிரதான கால்வாயில் இருந்து கடந்த 27-ஆம் தேதி தண்ணீர் திறக்கப்பட்டது. இந்த கால்வாயில் தற்போது தண்ணீர் வரத்து அதிகரித்திருப்பதால் அப்பகுதியைச் சேர்ந்த இளைஞர்கள் உட்பட ஏராளமானோர் அங்கு குளிப்பதை வழக்கமாகக் கொண்டுள்ளனர். நேற்று இது போல் பலரும் அங்கு குளித்துக் கொண்டிருந்தபோது திடீரென அந்த கால்வாயில் ஆண் சடலம் ஒன்று மிதந்தபடி வந்தது. இதை பார்த்த அனைவரும் அதிர்ச்சி அடைந்து அங்கிருந்து ஓடினார்கள்.

இதுகுறித்து தகவலின் பேரில் அங்கு வந்த அப்பன்திருப்பதி காவல்துறையினர் அதனைக் கைப்பற்றி பிரேத பரிசோதனைக்கு அனுப்பி வைத்தனர். உயிரிழந்த நபர் நீரில் மூழ்கி பலியானரா அல்லது கொலையா என்ற கோணத்தில் காவல்துறையினர் விசாரித்து வருகின்றனர்.