யானை தந்தத்தை கடத்த முயன்ற குற்றத்திற்காக 5 பேரை வனத்துறையினர் கைது செய்துள்ளனர்.
திண்டுக்கல் மாவட்டத்தில் உள்ள சவரிக்காடு மலை கிராமத்திற்கு மோட்டார் சைக்கிளில் யானை தந்தத்தை கடத்தி செல்வதாக வனத்துறையினருக்கு ரகசிய தகவல் கிடைத்துள்ளது. அந்த தகவலின் படி வனத்துறையினர் தேக்கந்தோட்டம் என்ற இடத்தில் தீவிர வாகன சோதனையில் ஈடுபட்டுள்ளனர். அப்போது அவ்வழியாக மோட்டார் சைக்கிளில் வந்த 2 பேரை வனத்துறையினர் பிடித்து விசாரித்துள்ளனர். அந்த விசாரணையில் அவர்கள் சவரிக்காடு பகுதியை சேர்ந்த ராஜ் மற்றும் முத்துக்குமார் என்பது தெரியவந்துள்ளது.
இதனையடுத்து வனத்துறையினர் நடத்திய சோதனையில் மோட்டார் சைக்கிளின் முன் பகுதி சீட் கவரில் இருந்த துணி பைக்குள் ஒரு அடி நீளமுடைய யானைத்தந்தம் இருந்தது தெரியவந்துள்ளது. இதுகுறித்து வனத்துறையினர் நடத்திய விசாரணையில் திடுக்கிடும் தகவல் தெரியவந்துள்ளது. அதாவது கடந்த 8 ஆண்டுகளுக்கு முன்பு முத்துக்குமார் சவரிக்காடு வனப்பகுதியில் இருந்து யானை தந்தத்தை கண்டெடுத்துள்ளார். தற்போது அதனை பழனியில் இருக்கும் ஒரு கும்பலுக்கு விற்பனை செய்வதற்காக கொண்டு சென்றுள்ளார்.
ஆனால் அந்த கும்பலை சேர்ந்தவர்கள் யானைத்தந்தம் பழமையாக இருப்பதாக கூறி வாங்க மறுத்துள்ளனர். இதனால் மீண்டும் அதனை சவரிகாட்டுக்கு கொண்டு சென்றதாக முத்துக்குமார் கூறியுள்ளார். இதனையடுத்து அந்த கும்பலை பிடிக்க வனத்துறையினர் திட்டமிட்டனர். அதாவது அந்த கும்பலை சேர்ந்த ஒருவருக்கு முத்துக்குமார் செல்போன் மூலம் தொடர்பு கொண்டு தனது மோட்டார் சைக்கிள் பெட்ரோல் இல்லாமல் நின்று விட்டது என கூறியுள்ளார். எனவே பழனி பேருந்து நிலையத்திற்கு வந்து பெட்ரோல் வாங்க தேவையான பணத்தை வாங்கிக் கொள்வதாக முத்துக்குமார் தெரிவித்துள்ளார்.
இதனை நம்பிய அந்த கும்பலை சேர்ந்தவர்கள் பழனி பேருந்து நிலையத்திற்கு வந்தனர். அப்போது அங்கு சாதாரண உடையில் கண்காணிப்பு பணியில் ஈடுபட்டுக்கொண்டிருந்த வனத்துறையினர் முத்துவேல், சிவலிங்கம், ராஜேஷ் பாபு ஆகிய 3 பேரையும் மடக்கிப் பிடித்துவிட்டனர். இதுகுறித்து வழக்கு பதிவு செய்த வனத்துறையினர் முத்துக்குமார் உள்பட ஐந்து பேரையும் கைது செய்து யானை தந்தம் மற்றும் மோட்டார் சைக்கிள்களை பறிமுதல் செய்துள்ளனர். இச்சம்பவம் அப்பகுதியில் பரபரப்பை ஏற்படுத்தியுள்ளது.