சர்வதேச இசை உலகின் உயரிய விருதாக கிராமிய விருதுகள் கருதப்படுகிறது. அமெரிக்காவின் லாஸ் வேகாஸில் 2022 ஆம் ஆண்டுக்கான 64-வது கிராமி விருது வழங்கும் விழா நடைபெற்றது. அதில் இந்திய இசைக்கலைஞர் ரிக்கி கேஜ், இந்திய வம்சாவளியைச் சேர்ந்த அமெரிக்க பாடகி ஃபால்குனி ஷா ஆகியோர் கிராமி விருதுகளை வென்று உலகம் முழுவதும் உள்ள இந்தியர்களுக்கு பெருமை சேர்த்துள்ளனர். மேலும் சிறந்த நியூ ஏஜ் ஆல்பம் பிரிவில் “டெவைன் டைட்ஸ்”க்காக ஸ்டீவர்ட் கோப்லேன்டுடன் இணைந்து இந்தியா இசைக்கலைஞர் ரிக்கி கேஜ் கிராமி விருதைப் பெற்றுள்ளார்.
இதனைத் தொடர்ந்து சிறந்த குழந்தைகள் ஆல்பம் பிரிவில் கலர்ஃபுல் வேர்ல்டு ஆல்பத்திற்கு இந்திய வம்சாவளியைச் சேர்ந்த அமெரிக்க பாடகி ஃபால்குனி ஷா கிராமி விருதை பெற்றுள்ளார். இந்த நிலையில் இவர்களுக்கு பிரதமர் மோடி வாழ்த்து தெரிவித்துள்ளார். இது குறித்து அவர் வெளியிட்டுள்ள டுவிட்டர் பதிவில், குறிப்பிடத்தக்க இந்த சாதனைக்கு பாராட்டுகள் மற்றும் உங்களது எதிர்கால முயற்சிகள் வெற்றி அடையவும் நல்வாழ்த்துக்கள் என்று தெரிவித்துள்ளார்.