திருநெல்வேலி மாவட்ட ஆட்சியர் விஷ்ணு சமீபத்தில் வெளியிட்ட செய்திக்குறிப்பில் கூறியிருப்பதாவது, வருவாய் துறையில் காலியாக இருக்கும் 60 கிராம உதவியாளர் பணியிடங்களை நிரப்ப இணைய வழி மற்றும் வேலை வாய்ப்புகள் மூலம் விண்ணப்பங்கள் பெறப்பட்டது. அந்த விண்ணப்பங்கள் சம்பந்தப்பட்ட தாசில்தார்கள் மூலம் சரிபார்க்கப்பட்டது. இந்நிலையில் விண்ணப்பதாரர்களுக்கு வருகிற 4-ஆம் தேதி (ஞாயிற்றுக்கிழமை) அன்று எழுத்து தேர்வு நடைபெற உள்ளது.
இந்த தேர்வு நெல்லை சாப்டர் மேல்நிலைப்பள்ளி, மானூர் அரசு மேல்நிலைப்பள்ளி, பாளையங்கோட்டை சேவியர் கல்லூரி, சேரன்மகாதேவி ஸ்காட் பொறியியல் கல்லூரி, அம்பை ஏ.வி.ஆர்.எம்.வி அரசு மகளிர் மேல்நிலைப்பள்ளி, ராதாபுரம் புனித அன்னாள் மெட்ரிகுலேஷன் பள்ளி, திசையன்விளை உலக ரட்சகர் மேல்நிலைப்பள்ளி, நாங்குநேரி பிரான்சிஸ் மெட்ரிகுலேஷன் மேல்நிலைப்பள்ளி ஆகிய 8 இடங்களில் நடைபெற உள்ளது. விண்ணப்பதாரர்கள் அனுமதி சீட்டை பதிவிறக்கம் செய்து கொள்ளலாம். அனுமதி சீட்டு இல்லாமல் விண்ணப்பதாரர்கள் தேர்வு எழுத அனுமதிக்கப்பட மாட்டார்கள். பால்பாயிண்ட் பேனா தவிர வேறு எந்த பொருட்களையும் தேர்வறைக்கு கொண்டு செல்ல அனுமதி இல்லை. காலை 9:30 மணிக்கு தேர்வறையில் இருக்க வேண்டும். 9:50 மணிக்கு மேல் வருபவர்களுக்கு அனுமதி இல்லை என கூறியுள்ளார்.