தமிழகம் முழுவதும் நாளை குரூப் 4 தேர்வு நடைபெறுகிறது. இதில் கிருஷ்ணகிரி மாவட்டத்தில் குரூப்-4 தேர்வை 144 மையங்களில் மொத்தம் 45,522 பேர் எழுதுகின்றனர். இது தொடர்பாக மாவட்ட ஆட்சியர் வெளியிட்டுள்ள செய்தியில்,கிருஷ்ணகிரி மாவட்டத்தில் டிஎன்பிஎஸ்சி குரூப் 4 தேர்வு நாளை நடைபெற உள்ளது. தேர்வுகள் சிறப்பான முறையில் நடைபெற தேவையான முன்னேற்பாடுகள் அனைத்தும் செய்யப்பட்டுள்ளது. கிருஷ்ணகிரி மாவட்டத்தில் மொத்தம் 8 தாலுகாவில் இந்த தேர்வுகள் நடைபெறுகின்றன.
கிருஷ்ணகிரி தாலுகாவில் 48 மையங்களில் 16 ஆயிரத்து 354 பேரும், அஞ்செட்டி தாலுகாவில் ஒரு தேர்வு மையத்தில் 425 பேரும், பர்கூர் தாலுகாவில் 11 மையங்களிலும் 3 ஆயிரத்து 167 பேரும், ஓசூர் தாலுகாவில் 35 மையங்களிலும் 10,601 பேரும், போச்சம்பள்ளி தாலுகாவில் 23 மையங்களிலும் 6 ஆயிரத்து 759 பேரும், சூளகிரி தாலுகாவில் 4 மையங்களில் 1,064 பேரும், தேன்கனிக்கோட்டை தாலுகாவில் 4 மையங்களில் 1,405 பேரும், ஊத்தங்கரை தாலுகாவில் 18 மையங்களில் 5,747 நபர்களும் ஆக மொத்தம் 144 தேர்வு மையங்களில் 45,522 பேர் தேர்வு எழுத உள்ளனர்.
தேர்வு நடைபெறும் மையங்களில் போலீஸ் பாதுகாப்பு, போக்குவரத்து வசதி மற்றும் மின் வசதி உள்ளிட்ட அனைத்து ஏற்பாடுகளும் செய்யப்பட்டுள்ளது. தேர்வை கண்காணிப்பதற்காக மேற்பார்வை அலுவலர்கள், பறக்கும் படை மற்றும் நடமாடும் அழகு ஆகியவை அமைக்கப்பட்டுள்ளன.மேலும் மாணவ மாணவிகள் தேர்வு நடைபெறும் இடத்திற்கு செல்லும் போது பொதுமக்கள் சொந்த காரணங்களுக்காக சாலை மறியல் போன்ற தடங்கள் ஏதாவது செய்தால் அல்லது வேறு எவ்வகையிலும் தொந்தரவு கொடுத்தால் அவர்களை கைது செய்ய நடவடிக்கை எடுக்க காவல்துறைக்கு உத்தரவிடப்பட்டுள்ளது.
மேலும் தேர்வு நடைபெறும் சமயத்தில் தேர்வு மையங்களை சுற்றி ஏதாவது இடையூறு செய்தால் அந்த நபர்கள் மீது பொது அமைதிக்கு குந்தகம் ஏற்படுத்திய செயலுக்காக கடும் நடவடிக்கை மேற்கொள்ளப்படும் என தெரிவிக்கப்பட்டுள்ளது.