மர்ம விலங்கு தாக்கி ஆடு உயிரிழந்ததால் பொதுமக்கள் மிகவும் அச்சத்தில் உள்ளனர்.
ஈரோடு மாவட்டத்திலுள்ள பங்களாபுதூர் பகுதியில் நல்லாயாள் என்பவர் வசித்து வருகிறார். இவர் அப்பகுதியில் இருக்கும் தனது தோட்டத்தில் ஆடு, மாடுகளை வளர்த்து வருகிறார். நேற்று முன்தினம் மாலை நேரத்தில் தோட்டத்தில் இருக்கும் ஆடுகள் அலறி சத்தம் போட்டுள்ளது. இதனால் நல்லாயாள் தோட்டத்திற்கு சென்று பார்த்தபோது ஒரு ஆடு ரத்த காயத்துடன், 2 ஆடுகள் படுகாயத்துடன் கிடந்ததை கண்டு அதிர்ச்சி அடைந்தார். மேலும் ஆட்டிற்கு அருகில் ஒரு விலங்கின் கால்தடம் பதிவாகியுள்ளது.
இதுகுறித்து உடனடியாக வனத்துறையினருக்கு தகவல் தெரிவிக்கப்பட்டுள்ளது. அந்த தகவலின் பேரில் சம்பவ இடத்திற்கு விரைந்து சென்ற வனத்துறையினர் அங்கு பதிவான கால் தடத்தை ஆய்வு செய்துள்ளனர். ஆனால் எந்த விலங்கு ஆட்டை கடித்து கொன்றது என்பது உறுதியாக தெரியாததால் வனத்துறையினர் அங்கு இரண்டு கண்காணிப்பு கேமராக்களை பொருத்தியுள்ளனர். இப்பகுதியில் மர்ம விலங்கு இரவு நேரத்தில் கால்நடைகளை வேட்டையாடி வருவதால் பொதுமக்கள் மிகவும் அச்சத்தில் உள்ளனர்.