மோட்டார் சைக்கிள் விபத்துக்குள்ளானதில் அரசு பள்ளி ஆசிரியரின் கணவர் உயிரிழந்த சம்பவம் சோகத்தை ஏற்படுத்தியுள்ளது.
தர்மபுரி மாவட்டத்தில் உள்ள அய்யம்பட்டி கிராமத்தில் சென்னப்பன் என்பவர் வசித்து வந்துள்ளார். இவருக்கு சாந்தி என்ற மனைவியும், ஒரு மகனும் இருக்கின்றனர். இதில் சாந்தி அரசு பள்ளியில் ஆசிரியராக வேலை பார்த்து வருகிறார். இந்நிலையில் சென்னப்பன் டியூஷனுக்கு சென்ற தனது மகனை அழைப்பதற்காக மோட்டார் சைக்கிளில் சென்றுள்ளார். இதனையடுத்து மகனுடன் அய்யம்பட்டி ஆத்துப்பாலம் அருகே சென்றபோது சாலையின் குறுக்கே நாய் வந்ததால் தந்தையும் மகனும் தூக்கி வீசப்பட்டனர். இதனால் படுகாயம் அடைந்த இரண்டு பேரையும் அக்கம் பக்கத்தினர் மீட்டு மருத்துவமனையில் சிகிச்சைக்காக அனுமதித்தனர். அங்கு சிகிச்சை பலனின்றி சென்னப்பன் பரிதாபமாக உயிரிழந்தார். சிறுவனுக்கு சிகிச்சை அளிக்கப்பட்டு வருகிறது. இந்த விபத்து குறித்து வழக்கு பதிந்த போலீசார் விசாரணை நடத்தி வருகின்றனர்.