பிரான்ஸ்நாட்டின் கேன்ஸ் நகரில் வருடந்தோறும் சர்வதேச திரைப்பட விழா நடைபெறுவது வழக்கம் ஆகும். அதன்படி இந்த வருடம் பிரான்சில் 75-வது கேன்ஸ் சர்வதேச திரைப்பட விழா மே 17ஆம் தேதி தொடங்கியது. இது வரும் 28ஆம் தேதி வரை 12 நாட்கள் விழா விமர்சியாக நடைபெற இருக்கிறது. வருடந்தோறும் இத்திரைப்பட விழாவில் பங்கேற்கவும், தங்களின் படம் அதில் திரையிடப்பட வேண்டும் என்பதும் சர்வதேச திரைக்கலைஞர்களின் கனவாக இருந்து வருகிறது. இதில் முதல் முறையாக கவுரவத்திற்கான நாடாக அதிகாரப்பூர்வ முறையில் இந்தியாவின் பெயர் அறிவிக்கப்பட்டுள்ளது.
இதனையொட்டி இந்தியா சார்பாக மத்திய மந்திரி அனுராக் தாக்குர் தலைமையிலான 11 பேர் கொண்ட குழு கேன்ஸ் திரைப்பட விழாவில் கலந்துகொள்ள புறப்பட்டு சென்றுள்ளது. அப்போது அதன் தொடக்க விழாவில் இந்தியா சார்பாக பங்கேற்றுள்ள மத்திய மந்திரி அனுராக் தாக்குர், பாடலாசிரியர் பிரசூன் ஜோஷி, மூத்த இயக்குனர் சேகர் கபூர், இசை அமைப்பாளர் ஏ.ஆர். ரகுமான், நடிகர்கள் மாதவன், நவாசுதின் சித்திக் உள்ளிட்டோருக்கு சிவப்பு கம்பள வரவேற்பு வழங்கப்பட்டது. இதேபோல் இவ்விழாவில் தென்னிந்திய நடிகைகளான தமன்னா, பூஜாஹெக்டே ஆகியோரும் இந்திய குழுவினரின் ஒரு பகுதியாக பங்கேற்றனர்.
அதன்பின் நடிகர் மாதவன் தயாரிப்பில் உருவாகிய ராக்கெட்ரி படம் கேன்ஸ் திரைப்பட விழாவில் திரையிடப்படுகிறது. இவ்விழாவில் பங்கேற்ற நடிகை பூஜா ஹெக்டே அண்மையில் தமிழில் வெளியாகிய “பீஸ்ட்” திரைப்படத்தில் நடித்து ரசிகர்களை கவர்ந்தவர். இந்நிலையில் விழாவில் பங்கேற்றது குறித்து பூஜாஹெக்டே கூறியதாவது, ஏதேனும் ஒன்றை பிரபலப்படுத்துவதற்காக நான் இங்கு வரவில்லை. எனினும் இந்தியாவை அடையாளப்படுத்தும் பிரதிநிதியாக வந்து இருக்கிறேன். இந்திய திரைப்படங்களை கொண்டாடும் ஓர் இந்திய நடிகையாக நான் இவ்விழாவில் பங்கேற்க வந்து இருப்பது உண்மையில் எனக்கு கவுரவம் அளிக்கிறது என்று அவர் தெரிவித்துள்ளார்.