கேரளாவில் கனமழை பெய்து வரும் காரணத்தினால் 5 மாவட்டங்களுக்கு ரெட் அலார்ட் எச்சரிக்கை விடப்பட்டுள்ளது.
அரபிக்கடல் மற்றும் வங்க கடலில் உருவாகியுள்ள காற்றழுத்த தாழ்வு பகுதியால் கேரளாவில் வெள்ளிக்கிழமை இரவு முதல் கனமழை பெய்து வருகிறது. மேலும் கேரளாவில் 5 மாவட்டங்களில் மிக அதிக கன மழை பெய்ய வாய்ப்புள்ளதாக வானிலை ஆய்வு மையம் எச்சரிக்கை விடுத்துள்ளது. பத்தினம் திட்டா, எர்ணாகுளம், கோட்டயம், இடுக்கி, திரிசூர் ஆகிய மாவட்டங்களுக்கு ரெட் அலர்ட் எச்சரிக்கை விடுக்கப்பட்டுள்ளது.
அதேபோல் திருவனந்தபுரம், கொல்லம், ஆலப்புழா, பாலக்காடு, கோழிக்கோடு மற்றும் வயநாடு ஆகிய பகுதிகளுக்கு ஆரஞ்சு எச்சரிக்கை விடப்பட்டுள்ளது. இதனைத் தொடர்ந்து கேரளாவில் மக்கள் நீர் நிலைகளுக்கு செல்ல வேண்டாம் என்று அறிவுறுத்தப்பட்டுள்ளது. குறிப்பாக தெற்கு மற்றும் மத்திய மாவட்டங்களில் மக்கள் கூடுதல் கவனத்துடன் இருக்க வேண்டும் என மாநில பேரிடர் மேலாண்மை நிர்வாகம் தெரிவித்துள்ளது.