கோலார் புறநகர் பகுதியில் 20 குரங்குகளுக்கு விஷம் கொடுத்துக் கொன்ற கொடூர சம்பவம் அரங்கேறியுள்ளது.
கோலார் புறநகர் பகுதியில் நேற்று ஒரு பெரிய சாக்கு மூட்டை மர்மமான முறையில் கிடந்தது. அதை பார்த்த அப்பகுதி மக்கள் போலீசாருக்கு உடனடியாக புகார் தெரிவித்தனர். அதன் பேரில் அங்கு வந்த போலீசார் சாக்கு மூட்டையை கைப்பற்றி பிரித்து பார்த்தனர். அந்த சாக்குமூட்டையில் 20க்கும் மேற்பட்ட குரங்குகளின் உடல்கள் இருந்தன. இந்த குரங்குகளுக்கு யாரோ மர்ம நபர்கள் உணவில் விஷம் கலந்து கொடுத்து கொன்று உடல்களை சாக்குப் பையில் திணித்து ரோட்டோரத்தில் வீசிச் சென்றது தெரியவந்தது.
இதையடுத்து போலீசார் குரங்குகளின் உடல்களை வனத்துறையினரிடம் ஒப்படைத்தனர். அவர்கள் குரங்குகளின் உடல்களை பிரேத பரிசோதனைக்காக கால்நடை ஆஸ்பத்திரிக்கு அனுப்பி வைத்தனர். இச்சம்பவம் குறித்து அப்பகுதி போலீசார் வழக்கு பதிவு செய்து குரங்குகளை கொன்ற மர்மநபர்களை வலைவீசி தேடி வருகின்றனர்.