கொரோனா மட்டும் இல்லை… கனமழை மற்றும் வெள்ளத்தாலும் தத்தளிக்கும் பீகார்..!!

பீகாரில் வருகிற அக்டோபரில் சட்டசபை தேர்தல் நடைபெற இருக்கிறது.  இதற்கு அனைத்துக் கட்சிகளும் தேர்தல் பணிகளில் ஈடுபட்டு வருகின்றன.  என்றாலும், கொரோனா பாதிப்புகளால், பீகார் (வால்மீகி நகர்) தொகுதிக்கான இடைத்தேர்தலை  செப்டம்பர் 7ந்தேதி வரை ஒத்தி வைத்து இந்திய தேர்தல் ஆணையம் உத்தரவிட்டுள்ளது.

இது ஒரு பக்கம் இருக்க அரசு நிர்வாகத்திற்கு கூடுதல் சுமை கொடுக்கும் நிலையில் தற்போது கனமழை பாதிப்பும் சேர்ந்து உள்ளது.  நாட்டின் வடபகுதிகளில் சில நாட்களாக தொடர் கனமழை பெய்து வருகிறது.  இதனால், டெல்லி, அசாம், பீகார் மற்றும் உத்தரகாண்ட் போன்ற மாநிலங்களில் வெள்ளம் ஏற்பட்டு மக்களின் நிலைமை மோசமாக பாதிப்படைந்து உள்ளது.  பீகாரில் பெய்த தொடர் கனமழையால் உருவான வெள்ளத்திற்கு 7.65 லட்சம் பேர் பாதிக்கப்பட்டு, பலரது வீடுகள் வெள்ள நீரால் சூழப்பட்டுள்ளன.  பலர் இருப்பிடங்களையும், கால்நடைகளையும் இழந்த நிலையில் 13 ஆயிரத்துக்கும் மேலானோர், மீட்கப்பட்டு நிவாரண முகாம்களில் தங்க வைக்கப்பட்டுள்ளனர்.

தேசிய பேரிடர் பொறுப்பு படை மற்றும் மாநில பேரிடர் பொறுப்பு படை போன்ற 21 குழுக்கள் சேர்ந்து வெள்ளத்தில் சிக்கியவர்களை மீட்டெடுக்கும் பணியில் ஈடுபட்டு வருகின்றன.  இருந்தும், சில பகுதிகளில் வீடுகள் தண்ணீரால் மூழ்கடிக்கப்பட்டுவிட்டன.  இதனால் பாதுகாப்புள்ள பகுதிகளில் மக்கள் தஞ்சமடைந்து வருகின்றனர். வெள்ள பாதிப்புகளுக்கு இடையே, பீகாரில் ஒரே நாளில் கொரோனாவால் பாதிக்கப்பட்டவர்களின் எண்ணிக்கை 1,820 ஆக உள்ளது.  இதனால், மொத்த பாதிப்பு  33,511 ஆக உள்ளது. என சுகாதார துறை தெரிவித்திருக்கிறது.  தற்போது கொரோனா பாதிப்பு, ஊரடங்கு மற்றும் தொடர் கனமழையால் ஏற்பட்ட வெள்ள பாதிப்பு போன்றவற்றால் பீகார் பல வழிகளில் சோதனைகளை சந்தித்து வருகின்றது.