கோழி வியாபாரி டாஸ்மார்க் கடையில் தூக்கில் தொங்கிய சம்பவம் அப்பகுதியில் பெரும் பரபரப்பை ஏற்படுத்தியுள்ளது.
நாமக்கல் மாவட்டம் கீரம்பூர் பகுதியில் உள்ள மதுபானக்கடையின் பின்புறம் உள்ள பாரில் ஒரு நபர் தூக்கில் பிணமாக தொங்கி கொண்டிருந்துள்ளார். இதனை பார்த்த அப்பகுதியினர் உடனடியாக பரமத்திவேலூர் காவல்நிலையத்திற்கு தகவல் தெரிவித்துள்ளனர். தகவலறிந்து சம்பவ இடத்திற்கு சென்ற காவல்துறையினர் தூக்கில் தொங்கியவரின் உடலை மீட்டு பிரேத பரிசோதனைக்காக அரசு மருத்துவமனைக்கு அனுப்பி வைத்துள்ளனர்.
இதனையடுத்து காவல்துறையினர் நடத்திய விசாரணையில் உயிரிழந்த நபர் திருப்பூர் மாவட்டம் சொர்ணபுரி லே-அவுட் கோம்பை பகுதியை சேர்ந்த ராஜேந்திரன் என்பது தெரியவந்துள்ளது. கோழி வியாபாரியான இவர் கோழிகள் வாங்குவதற்காக நாமக்கலுக்கு வந்ததும் விசாரணையில் தெரியவந்துள்ளது. இதனைதொடர்ந்து ராஜேந்திரன் தூக்குபோட்டு தற்கொலை செய்து கொண்டாரா அல்லது வேறு ஏதேனும் காரணம் உள்ளதா என காவலதுறையினர் பல்வேறு கோணங்களில் விசாரணை நடத்தி வருகின்றனர்.