திருச்சி ஏர்போர்ட்டில் வைத்து நீதிமன்றத்தில் ஆஜராகாமல் வெளிநாட்டிற்கு தப்பித்து சென்ற முத்துப்பேட்டை வாலிபரை கைது செய்துள்ளனர்.
திருவாரூர் மாவட்டம், முத்துப்பேட்டை ஆசாத் நகரில் வசித்து வருபவர் பக்கிரி முகமது. இவருடைய மகன் 37 வயதுடைய முகமது யூசுப். இவர் கடந்த 2005ஆம் வருடம் ஒரு வழக்கில் கைது செய்யப்பட்ட நிலையில் ஜாமீனில் வெளியே வந்த அவர் நீதிமன்றத்தில் ஆஜராகாமல் கத்தார் நாட்டிற்கு தப்பித்து சென்றார். அதன்பின் திருத்துறைப்பூண்டி நீதிமன்றம் முகமது யூசப்பை பிடிக்க வாரண்டு பிறப்பித்தது.
இதனையடுத்து திருவாரூரில் போலீஸ் சூப்பிரண்டு விஜயகுமார் உத்தரவின் பேரில் முத்துப்பேட்டை காவல்துறையினர் முகமது யூசுப்பின் பாஸ்போர்ட் விபரங்கள் அனைத்தையும் சர்வதேச விமான நிலைய எமிக்கிரேஷனிற்கு அனுப்பி வைத்துள்ளனர். இந்நிலையில் நேற்று முன்தினம் கத்தாரில் இருந்து விமானம் மூலம் திருச்சி விமான நிலையத்திற்கு முகமது யூசுப் வந்த போது அங்கு இருந்த விமான நிலைய எமிக்கிரேஷன் காவல்துறையினர் அவரை கைது செய்து முத்துப்பேட்டை காவல் துறையினருக்கு தகவல் அளித்தனர்.
அதன்பின்னர் முத்துப்பேட்டை காவல்துறையினர் அவரை கைது செய்து திருத்துறைபூண்டி சிறையில் அடைத்துள்ளனர். இதில் சிறப்பாக செயல் புரிந்த முத்துப்பேட்டை காவல்துறையினரை திருவாரூர் போலீஸ் சூப்பிரண்டு விஜயகுமார் பாராட்டியுள்ளார்.