தண்ணீரில் மூழ்கி ஆசிரியர் உயிரிழந்த சம்பவம் சோகத்தை ஏற்படுத்தியுள்ளது.
மதுரை மாவட்டத்தில் உள்ள உசிலம்பட்டி பகுதியில் சிவா என்பவர் வசித்து வந்துள்ளார். இவர் அப்பகுதியில் இருக்கும் தனியார் பள்ளியில் ஆசிரியராக பணிபுரிந்து வந்துள்ளார். இந்நிலையில் சிவா தனது நண்பர்களான முத்து, சுரேஷ், இளங்கோவன் ஆகியோருடன் திண்டுக்கல் மாவட்டத்திலுள்ள அணைப்பட்டி ஆஞ்சநேயர் கோவிலுக்கு சாமி கும்பிடுவதற்காக சென்றுள்ளார். இவர்கள் சாமி கும்பிட்டு விட்டு நடகோட்டை கிராமம் அருகே வைகை ஆற்றில் குளித்து கொண்டிருந்தனர். அப்போது சிவா நீச்சல் அடித்தபடி ஆழமான பகுதிக்கு சென்றுள்ளார்.
சிறிது நேரத்தில் நீச்சலடிக்க முடியாமல் தண்ணீரில் மூழ்க தொடங்கிய சிவா காப்பாற்றுங்கள் என சத்தம் போட்டுள்ளார். இதனை பார்த்ததும் செய்வதறியாது தவித்த நண்பர்கள் உடனடியாக தீயணைப்பு துறையினருக்கு தகவல் தெரிவித்துள்ளனர். அந்த தகவலின் படி சம்பவ இடத்திற்கு விரைந்து சென்ற தீயணைப்பு வீரர்கள் சிவாவின் சடலத்தை மீட்டு அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர். மேலும் இதுகுறித்து வழக்குப்பதிவு செய்த காவல்துறையினர் தீவிர விசாரணை மேற்கொண்டு வருகின்றனர்.