தமிழக முதல்வர் எடப்பாடி பழனிசாமி தொகுதியில் சசிகலாவை வரவேற்று போஸ்டர் ஒட்டப்பட்டுள்ளது அதிமுக கட்சியில் சலசலப்பு ஏற்பட்டுள்ளது.
சொத்துக்குவிப்பு வழக்கில் சிறை தண்டனை அனுபவித்து கொண்டிருந்த சசிகலா, தனது நான்கு ஆண்டுகள் சிறை வாசத்தை முடித்து, கடந்த ஜனவரி 27 ஆம் தேதி பெங்களூரு பரப்பன அக்ரஹாரா சிறையிலிருந்து விடுதலையானார். ஆனால் தனது உடல் நலக்குறைவு காரணமாக பெங்களூரு விக்டோரியா மருத்துவமனையில் சிகிச்சை பெற்று வந்தார். அதன் பிறகு உடல் நலம் தேறிய தான் டிஸ்சார்ஜ் செய்யப்பட்ட அவர் கொரோனா பாதிப்பு காரணமாக பெங்களூருவில் தன்னைத் தனிமைப் படுத்திக் கொண்டிருந்தார். இந்நிலையில் பெங்களூருவில் இருந்து இன்று சசிகலா தமிழகம் திரும்பியுள்ளார். தமிழக எல்லையில் அவரின் ஆதரவாளர்கள் ஆரவார வரவேற்பு அளித்தனர்.
அவர் ஓசூர் ஜூஜூவாடி அருகே வந்து கொண்டிருந்த போது அவரின் காரில் அதிமுக கொடி பறந்தால், கார் தடுத்து நிறுத்தப்பட்டது. அதன் பிறகு வேறு ஒரு காரில் சென்னை நோக்கி அவர் புறப்பட்டார். தமிழகத்தில் சசிகலா வருகையை ஒட்டி பல்வேறு இடங்களில் அவரின் ஆதரவாளர்கள் போஸ்டர் ஒட்டியுள்ளனர். அதன்படி முதல்வர் எடப்பாடி பழனிசாமி தொகுதியில் ஒட்டப்பட்டுள்ள போஸ்டரால் பரபரப்பு ஏற்பட்டுள்ளது. அதில், துரோகத்தை அழிக்க வந்த துர்க்கையே, வருக வருக என்ற வாசகம் இடம்பெற்றிருந்தது. முதல்வர் தொகுதியிலேயே சசிகலாவை வரவேற்ற இப்படி போஸ்டர் ஒட்டப்பட்டிருந்தது கட்சியில் சலசலப்பை ஏற்படுத்தியுள்ளது.