தடுப்பூசி, ஆக்சிஜன் பற்றாக்குறை பற்றி சமூக வலைதளங்களில் கருத்து பரப்புபவர்கள் மீது எந்த நடவடிக்கையும் எடுக்கக்கூடாது என்று உச்ச நீதிமன்றம் உத்தரவிட்டுள்ளது.
இந்தியாவில் கடந்த சில நாட்களாக கொரோனா தொற்று தொடர்ந்து அதிகரித்துக் கொண்டு வருகின்றது. இவற்றை கட்டுப்படுத்துவதற்காக மத்திய அரசு பல்வேறு முயற்சிகளை மேற்கொண்டு வருகின்றது. இருப்பினும் தொற்று தொடர்ந்து அதிகரித்துக் கொண்டு வருவதால் பல மாநிலங்களில் இரவு நேர ஊரடங்கு அமல்படுத்தப்பட்டுள்ளது. அதுமட்டுமல்லாமல் பல மாநிலங்களில் தடுப்பூசி மற்றும் ஆக்சிஜன் தட்டுப்பாடு காரணமாக நோயாளிகள் உயிரிழந்து வருகின்றனர்.
மேலும் இதுதொடர்பான கருத்துக்களையும் சமூக வலைதளங்களில் பதிவிட்டு வருகின்றனர். இந்நிலையில் உச்ச நீதிமன்றம் தடுப்பூசி ஆக்ஸிஜன் பற்றாக்குறை குறித்து சமூக வலைதளங்களில் கருத்து கூறுபவர்கள், உதவி கேட்பவர்கள் மீது மத்திய மாநில அரசுகள் எந்த நடவடிக்கையும் எடுக்கக்கூடாது என உத்தரவிட்டுள்ளது. மீறினால் அவர்களுக்கு எதிரான நடவடிக்கையை நீதிமன்றம் மேற்கொள்ளும் என அனைத்து மாநில காவல்துறை டிஜிபிகளுக்கும் உத்தரவு பிறப்பித்துள்ளது.