மது குடிக்க தண்ணீர் தர மறுத்ததால், தொழிலாளியை பாட்டிலால் தாக்கியவரை காவல்துறையினர் வலைவீசி தேடி வருகின்றனர்.
ஈரோடு மாவட்டம், கோபி நாய்க்கன்காடு பகுதியில் கூலிதொழிலாளியான தர்மராஜ்(40) என்பவர் வசித்து வந்தார். இவர் அப்பகுதியில் உள்ள குப்பை கிடங்கு அருகில் டாஸ்மாக் கடையில் மது வாங்கி குடித்துக் கொண்டிருந்தார். அப்போது கோபி புதுப்பாளையம் பகுதியை சேர்ந்த முருகன்(54) என்பவரும் அந்த பகுதிக்கு மதுகுடிக்க வந்துள்ளார். அப்போது தர்மராஜ் முருகனிடம் மது கலந்து குடிப்பதற்கு தண்ணீர் கேட்டுள்ளார். அதற்கு முருகன் தர மறுத்துள்ளார்.
இதனால் அவர்கள் இருவருக்கும் இடையே தகராறு ஏற்பட்டு தாக்கிக் கொண்டனர். இதனால் ஆத்திரம் அடைந்த முருகன் அருகில் கிடந்த மது பாட்டிலை எடுத்து தர்மராஜ் தலையில் அடித்து விட்டார். இதில் அவருக்கு தலையில் பலத்த காயம் ஏற்பட்டது இதனால் அலறி துடித்த தர்மராஜை அக்கம்பக்கத்தினர் மீட்டு 108 ஆம்புலன்ஸ் மூலம் கோவை அரசு மருத்துவமனைக்கு அனுப்பி வைத்தனர். அங்கு அவருக்கு தீவிர சிகிச்சை அளிக்கப்பட்டு வருகிறது. இது குறித்து கோபி காவல்துறையினர் வழக்கு பதிந்து முருகனை வலைவீசி தேடி வருகின்றனர்.