நடிகர் சல்மான் கான் தொகுத்து வழங்கும் இந்தி பிக்பாஸ் தொலைக்காட்சி நிகழ்ச்சியை வடஇந்தியாவில் பலபேர் பார்க்கின்றனர். இதற்கிடையில் இந்நிகழ்ச்சி சர்ச்சைகளில் சிக்கி வருகிறது. அதாவது, 10 பெண்களுக்கு பாலியல் தொல்லை கொடுத்த புகாரில் சிக்கிய டிரைக்டர் சஜித்கானை பிக்பாசில் போட்டியாளராக சேர்த்ததற்கு எதிர்ப்பு தெரிவித்து இந்தி நடிகை மந்தனா கரிமி சினிமாவைவிட்டே விலகுவதாக அறிவித்தார்.
அத்துடன் சஜித்கானை பிக்பாசிலிருந்து நீக்கும்படி டெல்லி மகளிர் ஆணையத்தின் தலைவி சுவாதி மலிவால் மத்திய மந்திரி அனுராக் தாக்கூருக்கு கடிதம் எழுதினார். இந்நிலையில் பிக்பாஸ் வீட்டில் இப்போது அடிதடி சண்டை நடந்திருக்கிறது. பிக்பாஸ் போட்டியாளராக பங்கேற்றுள்ள நடிகை அர்ச்சனா கவுதமுக்கும், இன்னொரு போட்டியாளரான ஷிவ் தாக்கரே என்பவருக்கும் வாய் தகராறு ஏற்பட்டு பிறகு அது கைகலப்பாக மாறியது.
இதில் ஷிவ் தாக்கரேயை, அர்ச்சனா கவுதம் முகத்தில் கைகளால் குத்தி கடுமையாக தாக்கியுள்ளார். இதனால் அவருக்கு காயம் ஏற்பட்டு உடல்நிலையும் குன்றியது. அதன்பின் அர்ச்சனா கவுதமை பிக்பாஸ் வீட்டிலிருந்து வெளியேற்றினர். இந்த சம்பவம் பெரும் பரபரப்பை ஏற்படுத்தியுள்ளது.