சந்தன மரக்கட்டைகளை விற்பனை செய்வதற்காக கொண்டு சென்ற தொழிலாளியை காவல்துறையினர் கைது செய்தனர்.
விழுப்புரம் மாவட்டத்தில் உள்ள விக்கிரவாண்டி பகுதியில் காவல்துறையினர் தீவிர ரோந்து பணியில் ஈடுபட்டுள்ளனர். இந்நிலையில் புதுச்சேரியில் இருந்து முண்டியம்பாக்கம் நோக்கி சென்ற ஒரு மொபட்டை காவல்துறையினர் நிறுத்தி சோதனை செய்தனர். அப்போது ஒரு சாக்கு பையில் 10 கிலோ சந்தன மரக்கட்டைகள் இருந்தது தெரியவந்தது. இதனையடுத்து காவல்துறையினர் நடத்திய விசாரணையில், அந்த நபர் திருவண்ணாமலை மாவட்டத்தை சேர்ந்த கிருஷ்ணன் என்பதும், சந்தன மரக்கட்டைகளை விற்பனை செய்வதற்காக கொண்டு சென்றதும் தெரியவந்தது. அதன் பின் காவல்துறையினர் கிருஷ்ணனை கைது செய்தனர். மேலும் அவரிடம் இருந்த சந்தன மரக்கட்டைகளை பறிமுதல் செய்து வனத்துறை அதிகாரிகளிடம் ஒப்படைத்தனர்.