சாலையோரம் கொட்டப்பட்டுள்ள குப்பைகளை விரைவில் அகற்றுமாறு பொதுமக்கள் வலியுறுத்தியுள்ளனர்.
மயிலாடுதுறை மாவட்டம் புதுப்பட்டினம் கிராமத்திலுள்ள புளியந்துறை-பழையார் செல்லும் சாலையில் ஊராட்சி சார்பில் குப்பைகள் கொட்டப்பட்டுள்ளது. இதனால் சாலை குறுகி காணப்படுகிறது. ஆகவே இரவு நேரங்களில் வாகனங்களில் செல்பவர்களுக்கு விபத்து ஏற்படும் அபாயம் உள்ளது. மேலும் பொதுமக்கள் அடிக்கடி பயன்படுத்தக் கூடிய இந்த சாலையில் இருபுறங்களிலும் இறைச்சி மற்றும் கோழி கழிவுகள், மக்காத குப்பைகள் என கொட்டுபட்டுள்ளதால் துர்நாற்றம் வீசுகிறது. இதனால் அந்தப் பகுதியில் வசிக்கும் மக்களுக்கு தொற்றுநோய் ஏற்படும் அபாயம் உள்ளது.
இந்த சாலை வழியாகத்தான் புயல் பாதுகாப்பு கூடம், ஆரம்ப சுகாதார நிலையம் மற்றும் கடலோர காவல் படை அலுவலகம் ஆகியவற்றிற்கு செல்ல வேண்டுமென்பதால், அரசு மருத்துவமனைக்கு செல்லும் பொதுமக்கள் மிகவும் சிரமப்பட்டு வருகின்றனர். எனவே பொதுமக்களின் நலனை கருத்தில் கொண்டு அந்த பகுதியிலுள்ள குப்பைகளை அகற்ற விரைவாக நடவடிக்கை எடுக்க வேண்டுமென ஊராட்சி உறுப்பினர்கள் மற்றும் பொதுமக்கள் வலியுறுத்தியுள்ளனர்.