சிங்கப்பூர் ஓபன்பேட்மிண்டன் போட்டியானது சிங்கப்பூரில் நடைபெற்று வருகிறது. இவற்றில் நேற்று நடைபெற்ற பெண்கள் ஒற்றையர் முதலாவது சுற்றுஆட்டம் ஒன்றில் முன்னாள் உலக சாம்பியனான இந்திய வீராங்கனை பி.வி.சிந்து 21-15, 21-11 என்ற நேர் செட்டில் பெல்ஜியத்தின் லியானி டானை தோற்கடித்து 2வது சுற்றுக்கு முன்னேறினார். இதையடுத்து மற்றொரு ஆட்டத்தில் இந்திய வீராங்கனை சாய்னாநேவால் 21-18, 21-14 எனும் நேர்செட்டில் சக நாட்டவரான மாளவிகா பான்சோத்தை வீழ்த்தி இந்திய ஓபன் போட்டியில் அவரிடம் கண்ட தோல்விக்கு பதிலடி கொடுத்தார். அத்துடன் இன்னொரு ஆட்டத்தில் உலக தர வரிசையில் 66வது இடத்தில் உள்ள இந்திய வீராங்கனை அஷ்மிதா சாலிஹா 21-16, 21-11 என்ற நேர் செட்டில் 12வது இடத்திலுள்ள தாய்லாந்தின் பூசனன் ஓங்பாம்ருங்பானுக்கு அதிர்ச்சியளித்தார்.
அதேபோன்று ஆண்கள் ஒற்றையர் பிரிவின் முதல் சுற்றில் இந்தியவீரர் எச்.எஸ்.பிரனாய் 21-13, 21-16 என்ற நேர் செட்டில் தாய்லாந்தின் சித்திகோம் தம்மாசினை தோற்கடித்து 2வது சுற்றுக்குள் நுழைந்தார். பின் மற்றொரு ஆட்டத்தில் தர வரிசையில் 77வது இடத்தில் உள்ள இந்திய வீரர் மிதுன் மஞ்சுநாத் 21-17, 15-21, 21-18 என்ற செட்கணக்கில் உலக சாம்பியன்ஷிப் போட்டியில் வெள்ளிப் பதக்கம் வென்றவரும், தரவரிசையில் 11வது இடத்தில் இருப்பவருமான சகநாட்டு வீரர் ஸ்ரீகாந்தை போராடி வீழ்த்தி 2வது சுற்றுக்குள் அடியெடுத்து வைத்தார். இந்த ஆட்டம் 1 மணிநேரம் நீடித்தது. ஸ்ரீகாந்தை போன்று பிற இந்தியவீரர்கள் காஷ்யப், சமீர்வர்மா போன்றோரும் முதல் சுற்றுடன் நடையை கட்டினர்.