நாடு முழுவதும் கொரோனா பரவல் வேகமாக பரவி வருகிறது. அதனால் பெரும்பாலான மாநிலங்களில் மீண்டும் பல கட்டுப்பாடுகள் அமலுக்கு வந்துள்ளன. அதுமட்டுமன்றி தடுப்பூசி போடும் பணியும் தீவிரப்படுத்தப்பட்டுள்ளது. ஆனால் நாளுக்கு நாள் கொரோனா பாதிப்பு அதனால் ஏற்படும் மரணமும் அதிகரித்துக் கொண்டே வருகிறது. அதிலும் குறிப்பாக ஆக்சிஜன் கிடைக்காமல் ஏற்படும் மரணங்கள் அதிகரித்து வருகின்றன.
இதையடுத்து ஒரு சில மாநிலங்களில் இரவு நேர ஊரடங்கு பிறப்பிக்கப்பட்டுள்ளது. அதன்படி தமிழகத்தில் கடந்த வாரம் இரவு நேர ஊரடங்கு பிறப்பிக்கப்பட்டது. மேலும் ஞாயிற்றுக்கிழமை ஊரடங்கு அமல்படுத்தப்பட்டு உள்ளது. நாட்டின் பெரும்பாலான மாநிலங்களில் ஆக்ஸிஜன் பற்றாக்குறை ஏற்பட்டுள்ளது. அதனால் நாளுக்கு நாள் உயிரிழப்பு எண்ணிக்கை அதிகரித்துக் கொண்டே வருகிறது.
இந்நிலையில் உத்திரப்பிரதேச மாநிலத்தில் ஆக்சிஜன் பற்றாக் குறையை சுட்டிக் காட்டி, சாமானியர் ஆக இருந்தாலும், சாமியாராக இருந்தாலும் பொய் சொன்னால் கன்னத்தில் அறை விழும் என்று நடிகர் சித்தார்த் கூறியிருந்தார். இதனையடுத்து எனது போன் நம்பரை தமிழக பாஜக ஐடி பிரிவு லீக் செய்ததால், கடந்த 24 மணி நேரமாக ஆபாச பேச்சு, கொலை மிரட்டல் அழைப்பு வருவதாக குற்றம் சாட்டிய சித்தார்த், நான் பேசுவதை யாராலும் நிறுத்த முடியாது என்று சூளுரைத்துள்ளார்.
இந்நிலையில் நடிகர் சித்தார்த்திற்கு கொலை மிரட்டல் விடுக்கப்பட்டது நடிகர் மெட்ரோ ஷிரிஷ் கண்டனம் தெரிவித்துள்ளார். உங்களை எதிர்த்து கேள்வி கேட்டால் மட்டுமே அவன் தேசத்துரோகி, நேர்மையாக கேள்வி கேட்பவரை நீங்கள் மிரட்டினால் தமிழ்நாட்டில் யாரும் அஞ்சப் போவதில்லை. மிரட்டிப் பணியவைக்க இது ஒன்றும் வடநாடு கிடையாது. இது தமிழ்நாடு. அதிகாரப் பூர்வமான நடவடிக்கைகளை செய்யுங்கள் என்று டுவிட்டரில் பதிவிட்டுள்ளார்.