மதுரை எய்ம்ஸ் மருத்துவமனைக்காக நடப்பட்ட செங்கலை திமுக சட்டமன்ற உறுப்பினரான உதயநிதி ஸ்டாலின் திருடிவிட்டதாக புதுக்கோட்டை பாஜகவினர் உதயநிதி ஸ்டாலின் மீது புகார் அளித்துள்ளனர். புதுக்கோட்டை மாவட்ட காவல்துறை கண்காணிப்பாளர் அலுவலகத்திற்கு சென்ற பாஜகவினர், உதயநிதி ஸ்டாலின் மீது புகார் மனு ஒன்றை அளித்தனர். அதில், மதுரை எய்ம்ஸ் மருத்துவமனை கட்டுவதற்காக அடிக்கல் நாட்டப்பட்ட செங்கலை உதயநிதி ஸ்டாலின் ஏற்கனவே தேர்தல் பிரச்சாரத்திற்கு கொண்டு வந்து பயன்படுத்தினார்.
இந்நிலையில் புதுக்கோட்டை மாவட்டம் ஆலங்குடி அருகே நேற்று நடைபெற்ற திமுக நிர்வாகியின் இல்ல திருமண விழாவில் உதயநிதி ஸ்டாலினுக்கு எய்ம்ஸ் என எழுதப்பட்ட செங்கல் பரிசாக வழங்கப்பட்டது. இதனால் அவர் செங்கலை திருடியது உறுதி செய்யப்பட்டுள்ளது. இதன் அடிப்படையில் உதயநிதி ஸ்டாலின் மீது நடவடிக்கை எடுக்க வேண்டும் என்று புகார் மனுவில் தெரிவிக்கப்பட்டுள்ளது. மேலும் உதயநிதி ஸ்டாலினை கைது செய்து விசாரணை நடத்த வேண்டும் எனவும் அவர்கள் வலியுறுத்தியுள்ளனர். இது பெரும் பரபரப்பை கிளப்பியுள்ளது.