சென்னை ராகவேந்திரா மண்டபத்தில் மாவட்ட நிர்வாகிகளுடன் நடிகர் ரஜினிகாந்த் இன்று ஆலோசனை நடத்தி வருகின்றார்.
நடிகர் ரஜினிகாந்த் வருகின்ற ஜனவரி மாதம் கட்சி தொடங்குவதாக சமீபத்தில் அறிவித்திருந்தார். அதனையடுத்து அக்கட்சியின் தலைமை ஒருங்கிணைப்பாளர் பதவிக்கு அர்ஜுனா மூர்த்தி நியமனம் செய்யப்பட்டுள்ளார். அதனைப்போலவே கட்சியின் மேற்பார்வையாளராக தமிழருவி மணியன் நியமிக்கப்பட்டுள்ளார். தற்போது கட்சி தொடங்குவதற்கான அனைத்து பணிகளையும் ரஜினி தீவிரமாக செய்து வருகின்றார். இந்நிலையில் ராகவேந்திரா மண்டபத்தில் தமிழருவி மணியன் மற்றும் அர்ஜூனா மூர்த்தி ஆகியோருடன் நேற்று நடிகர் ரஜினி ஆலோசனை நடத்தினார்.
அந்த ஆலோசனையில் புதிய கட்சி எங்கு தொடங்குவது, மாநாட்டை எங்கு அமைப்பது பற்றி ஆலோசனை செய்யப்பட்டதாக தகவல் வெளியாகியுள்ளது. அதுமட்டுமன்றி போஸ்டரில் அர்ஜுனா மூர்த்தி மற்றும் தமிழருவி மணியன், சுதாகர் ஆகியோர் புகைப்படம் இடம் பெறக்கூடாது என ரஜினி மக்கள் மன்றத்திற்கு அறிவுறுத்தியுள்ளார். இதனைத் தொடர்ந்து சென்னை ராகவேந்திரா கல்யாண மண்டபத்தில் நடிகர் ரஜினிகாந்த், மாவட்ட நிர்வாகிகளுடன் இன்று மீண்டும் ஆலோசனை நடத்தி வருகின்றார். இந்த ஆலோசனையில் ரஜினிகாந்த் பிறந்தநாள் நாளை மறுநாள் வருவதையொட்டி அதற்கான முன்னேற்பாடுகள் பற்றி விவாதிக்கலாம் என்று தகவல் வெளியாகியுள்ளது.