சென்னை மீனம்பாக்கம் பன்னாட்டு விமானம் நிலையத்திலிருந்து துபாய் போகும் விமானம் புறப்பட தயாராகி கொண்டு இருந்தது. அதில் செல்வதற்கு வந்த பயணிகளை விமான நிலைய பாதுகாப்பு அதிகாரிகள் சோதனை மேற்கொண்டனர். அப்போது சென்னை அம்பத்தூரைச் சேர்ந்த ஜனார்த்தனன் (40) என்பவர் துபாய் வழியே அமெரிக்கா செல்ல வந்தார். அவரது உடைமைகளை பாதுகாப்பு அதிகாரிகள் சோதனை மேற்கொண்டனர். இந்நிலையில் அவரிடம் நம் நாட்டில் தடைசெய்யப்பட்ட “சாட்டிலைட்” போன் வைத்திருந்தது தெரியவந்தது.
அதன்பின் அவரது பயணத்தை ரத்துசெய்த அதிகாரிகள் விசாரணை மேற்கொண்டனர். அப்போது அதிகாரிகளிடம் ஜனார்த்தனன் கூறியதாவது “நான் அமெரிக்காவில் சாப்ட்வேர் என்ஜினீயராக பணிபுரிகிறேன். சென்ற மாதம் 20-ஆம் தேதி அமெரிக்காவிலிருந்து துபாய் வழியாக சென்னைக்கு வந்தேன். அந்த நேரத்திலும் சாட்டிலைட் போனை நான் எடுத்து வந்தேன். அமெரிக்கா போன்ற நாடுகளில் இந்த போனை பயன்படுத்துவதற்கு தடையில்லை. நான் வருகையில் விமானம்நிலையத்தில் வைத்து சோதனை மேற்கொண்டனர்.
ஆனால் சாட்டிலைட் போனை கொண்டு வரக்கூடாது என தடுக்கவில்லை. இந்தியாவில் தடைசெய்யப்பட்டது என கூறவும் இல்லை” என்று தெரிவித்தார். பின் அதிகாரிகள் “இந்தியாவில் சாட்டிலைட்போனை பயன்படுத்துவதற்கு இந்திய அரசு தடைவிதித்துள்ளது. எனினும் தடையை மீறி நீங்கள் இந்த போனை பயன்படுத்தி இருக்கிறீர்கள்?. இது சட்டப்படி குற்றமாகும்” எனக்கூறி அவரிடம் இருந்த அந்த போனை பறிமுதல் செய்தனா். அத்துடன் அவரை சென்னை விமானம்நிலைய போலீசில் ஒப்படைத்தனர். இது தொடர்பாக விமான நிலைய காவல்துறையினர் ஜனார்த்தனனிடம் விசாரணை மேற்கொண்டு வருகின்றனர்.