சித்தூர் வனப்பகுதியில் செம்மரம் வெட்டுவதற்காக சென்ற தமிழகத்தை சேர்ந்த தொழிலாளி ஒருவர் மின்சாரம் தாக்கி பரிதாபமாக உயிரிழந்தார்.
ஆந்திர மாநிலம் சித்தூர் மாவட்டம் ஏர்ரவாரி பாளையம் அடுத்துள்ள ஓ. எஸ். கொள்ளப்பள்ளி வனப்பகுதியில் செம் மரங்கள் வெட்டப்படுவதாக வனத்துறையினருக்கு ரகசிய தகவல் ஒன்று கிடைத்துள்ளது.வனத்துறை அதிகாரிகள் உடனடியாக அப்பகுதி முழுவதும் தீவிர ரோந்து பணியில் ஈடுபட்டுள்ளனர். அச்சமயத்தில் தமிழகத்தை சார்ந்த 60 பேர் கொண்ட கும்பல் ஒன்று செம்மரங்களை வெட்டிக் கொண்டிருந்தனர். அதிகாரிகளை கண்டவுடன் அவர்கள் அனைவரும் அங்கிருந்து ஓட்டம் பிடித்தனர். அவர்களை சுற்றிவளைத்து அதிகாரிகள் பிடிக்க முயற்சி செய்தனர். ஆனால் அவர்கள் அனைவரும் தப்பி சென்று விட்டனர். அப்போது ஒருநபர் விவசாய நிலத்தில் வைக்கப்பட்டிருந்த மின்வேலியில் சிக்கி பரிதாபமாக உயிரிழந்துள்ளார்.
அவர்களை விரட்டிச் சென்ற வனத்துறையினர் உயிரிழந்தவரின் உடலை மீட்டு உடற்கூறு ஆய்வுக்காக அரசு மருத்துவமனைக்கு கொண்டு சென்றனர். இந்த சம்பவம் பற்றி அப்பகுதியை சேர்ந்த சப்-இன்ஸ்பெக்டர் சோமசேகர் வழக்கு பதிவு செய்து விசாரணை நடத்தியுள்ளார்.அப்போது விசாரணையில் மின்சாரம் தாக்கி உயிரிழந்த அவர் தமிழகத்தில் கள்ளகுறிச்சி என்ற பகுதியை சேர்ந்தவர் என்று தெரிய வந்துள்ளது. அதுமட்டுமன்றி தப்பிச்சென்ற 59 பேரை தேடும் பணியில் வனத்துறை அதிகாரிகள் அனைவரும் தீவிரமாக ஈடுபட்டுள்ளனர்.