செங்கல்பட்டு மாவட்டத்திலுள்ள மாமல்லபுரத்தில் வரும் 28-ஆம் தேதி முதல் ஆகஸ்டு 10ம் தேதி வரை சர்வதேச செஸ் ஒலிம்பியாட் போட்டிகள் நடைபெற இருக்கிறது. இப்போட்டிகளில் 187 நாடுகளை சேர்ந்த 2 ஆயிரம் செஸ் விளையாட்டு வீரர்கள் கலந்துகொள்கின்றனர். இதனால் போட்டி முன்னேற்பாடுகள் தொடர்பாகவும் சர்வதேச செஸ்வீரர்கள் தங்குவதற்கு ஓட்டல்களில் செய்யப்பட்டுள்ள வசதிகள் பற்றியும் ஆலோசிப்பதற்காக ஆர்.டி.ஓ. சஜ்ஜீவனா தலைமையில் மாமல்லபுரம் பேரூராட்சி அரங்கில் கூட்டம் நடந்தது. இவற்றில் மாமல்லபுரம் ஓட்டல், விடுதிகளின் பிரதிநிதிகள், உள்ளாட்சிமன்ற பிரதிநிதிகள், துப்புரவு பணியாளர்கள் மற்றும் பலர் பங்கேற்றனர். இதில் பங்கேற்ற ஓட்டல்கள், விடுதிகள் சங்கத்தின் பிரதிநிதிகள் செஸ் ஒலிம்பியாட் போட்டிகள் நடைபெறும் தினங்களில் சுற்றுலா பயணிகள் புராதன சின்னங்களை கண்டுகளிக்க மாமல்லபுரத்தில் அனுமதிக்கப்படுவார்களா என்று கேள்வி எழுப்பினர்.
அதற்கு பதிலளித்து பேசிய ஆர்.டி.ஓ. சஜ்ஜீவனா “மாமல்லபுரத்தில் செஸ் ஒலிம்பியாட் போட்டிகள் நடைபெறும் தினங்களில் சுற்றுலா பயணிகளுக்கு தடை விதிக்கப்படவில்லை. அவர்கள் வழக்கம்போல மாமல்லபுரம் புராதன சின்னங்களை கண்டுகளிக்கலாம். எனினும் அவர்கள் மாமல்லபுரத்தில் தங்குவதற்கு மட்டும் அறைகள் கிடைக்க வாய்ப்பு குறைவாக இருக்கும். ஏனெனில் செஸ் விளையாட்டு வீரர்கள் தங்குவதற்கு அனைத்து அறைகளையும் தமிழ்நாடு அரசு பதிவு செய்து விட்டதால் இங்கு வரும் சுற்றுலா பயணிகள் அந்த குறிப்பிட்ட தினங்களில் விடுதிகளில் தங்குவதற்கு அறைகள் கிடைப்பதற்கு வாய்ப்பு குறைவு ஆகும்.
செஸ் ஒலிம்பியாட் போட்டியையொட்டி மாமல்லபுரம் நகரத்தை சுகாதாரமாக வைத்திருக்க அனைத்து நடவடிக்கைகளையும் அதிகாரிகள் எடுக்க வேண்டும். போட்டி நடைபெற இருப்பதால் உலகநாடுகளின் கவனம் மாமல்லபுரம் நகரம் மீது திரும்பி இருக்கிறது. இதனால் இங்கு பிளாஸ்டிக் பயன்பாட்டை முற்றிலும் அதிகாரிகள் தடுத்துநிறுத்த வேண்டும். அதற்கு அனைவரின் ஒத்துழைப்பும் அவசியம் ஆகும்” என்று அவர் கூறினார். இக்கூட்டத்தில் மாமல்லபுரம் பேரூராட்சி தலைவர் வளர்மதி எஸ்வந்த்ராவ், பேரூராட்சி செயல் அலுவலர் கணேஷ், ஓட்டல்கள், மற்றும் விடுதிகள் அசோசியேஷன் தலைவர் ஜனார்த்தனம், தமிழ்நாடு ஓட்டல்கள் சங்கத்தின் செங்கல்பட்டு மாவட்ட தலைவர் பாண்டியன் மற்றும் பலர் பங்கேற்றனர்.