ஐபிஎல் 15-வது சீசனின் 29ஆவது லீக் போட்டியில் குஜராத் டைடன்ஸ், சென்னை சூப்பர் கிங்ஸ் அணிகள் மோதின. இந்த போட்டியில் முதலில் டாஸ் வென்ற குஜராத் அணி பந்துவீச்சை தேர்வு செய்தது. முதலாவதாக பேட்டிங்கில் களமிறங்கிய சிஎஸ்கே அணி 20 ஓவர்கள் முடிவில் 169/5 ரன்களை குவித்தது. போட்டியின் இறுதியில் குஜராத் அணி 19.5 ஓவர்கள் முடிவில் 170/7 ரன்கள் குவித்து, 3 விக்கெட்டுகள் வித்தியாசத்தில் வெற்றி பெற்றது. இந்த போட்டியில் வெற்றி பெற்றதன் மூலம் குஜராத் அணி 10 புள்ளிகளுடன் முதலிடத்தில் உள்ளது. அதேசமயம் சிஎஸ்கே ஒரு வெற்றியுடன் 9வது இடத்தில் நீடித்து வருகிறது.
இந்த நிலையில் செய்தியாளர்களை சந்தித்த ரவீந்திர ஜடேஜா, “ஆட்டத்தை சிறப்பாக தான் ஆரம்பித்தோம். பந்துவீச்சாளர்கள் முதல் 6 ஓவர்களில் அபாரமாக செயல்பட்டனர். ஆனால் நாங்கள் கடைசி 5 ஓவர்களின் போது எங்களுடைய திட்டத்தை முறையாக செயல்படுத்தவில்லை. யார்க்கர்களை நன்றாக வீசக்கூடிய கிறிஸ் ஜோர்டன் இந்த போட்டியிலும் சிறப்பாக செயல்படுவார் என்று நினைத்தேன். ஆனால் அவரால் அது இயலவில்லை. டி20 கிரிக்கெட் என்பது இதுதான். இதில் என்ன நடக்கும் என்பதை யாராலும் கணிக்கவே முடியாது” என்று அவர் கூறியுள்ளார்.