ஒரே நேர்கோட்டில் ஐந்து கோள்கள் வானில் தோன்றும் அதிசய நிகழ்வு ஜூன் 27-ஆம் தேதி நடைபெற உள்ளது.
சூரிய குடும்பத்தில் அமைந்துள்ள எட்டு கோள்களும் தங்களுடைய உரிய வட்டப்பாதையில் சூரியனை சுற்றிவரும். நாம் வாழும் பூமி சூரியனை ஒரு முறை முழுவதுமாக சுற்றி முடிக்க 365 நாட்கள் ஆகும். இதேபோல பிற கோள்கள் சூரியனை சுற்றி முடிக்க எடுத்துக்கொள்ளும் காலம் மாறுபடுகின்றது. கோள்கள் சூரியனை சுற்றி வரும் போது சில சமயங்களில் ஒரே நேர்கோட்டில் வரும்.
அந்த வகையில் இப்போது புதன், வெள்ளி, செவ்வாய், வியாழன், சனி ஆகிய ஐந்து கோள்கள் ஒரே நேர்கோட்டில் அணிவகுக்கும் அதிசய நிகழ்வினை வரும் 27ஆம் தேதி காணலாம். அதிகாலை சூரிய உதயத்திற்கு முன்பும், பின்பும் சூரியனுக்கு மேலே வளைவாக அணிவகுத்து இருக்கும். இந்த ஐந்து கோள்களை நாம் வெறும் கண்களால் பார்க்க முடியும் என்று கூறுகின்றனர்.
சுமார் 18 ஆண்டுகளுக்கு ஒருமுறை வானில் இது போன்ற அதிசய நிகழ்வு நடைபெறுகிறது. கடந்த 2004ஆம் ஆண்டு டிசம்பரில் இது போன்ற நிகழ்வு தோன்றிய நிலையில் இந்த நிகழ்வு தற்போது வரும் 27ம் தேதி தோன்றுகிறது. இதையடுத்து இந்த நிகழ்வு 2040 ஆம் ஆண்டு தோன்றும் என்று விஞ்ஞானிகள் தெரிவிக்கின்றனர்.