தமிழகத்தில் கொரோனா காரணமாக நிறுத்தப்பட்டிருந்த பல்வேறு ரயில் சேவைகள் மீண்டும் வழக்கம்போல இயக்கப்பட்டு வருகின்றன. அதன்படி திருநெல்வேலி -திருச்செந்தூர், தூத்துக்குடி-வாஞ்சி மணியாச்சி இடையே அடுத்த மாதம் முதல் முன்பதிவு இல்லாத விரைவு ரயில்கள் மீண்டும் இயக்கப்பட உள்ளதாக தெற்கு ரயில்வே அறிவித்துள்ளது. அதன்படி, திருநெல்வேலியில் இருந்து வரும் 1 ஆம் தேதி முதல் தினமும் காலை 10 மணிக்கு புறப்படும் முன்பதிவு இல்லாத விரைவு ரயில் 11.55 மணிக்கு திருச்செந்துார் சென்றடையும்.
திருச்செந்துாரில் இருந்து மாலை 4.25 மணிக்கு புறப்பட்டு திருநெல்வேலிக்கு மாலை 6 மணிக்கு சென்றடையும். துாத்துக்குடியில் இருந்து வரும் 2ம் தேதி முதல் தினமும் காலை 8.30 மணிக்கு புறப்படும் முன்பதிவு இல்லாத ரயில், காலை 9.15 மணிக்கு வாஞ்சி மணியாச்சிக்கு சென்றடையும். வாஞ்சி மணியாச்சியில் இருந்து தினமும் இரவு 7.20 மணிக்கு புறப்படும் பயணியர் ரயில், இரவு 8.10 மணிக்கு துாத்துக்குடி சென்றடையும் என தெற்கு ரயில்வே தெரிவித்துள்ளது.