தமிழகம் முழுவதும் கடந்த சில நாட்களாக கொரோனா மற்றும் அதன் உறுமாறிய தொற்றான ஒமைக்ரான் மிக வேகமாக பரவி வருகிறது. இதனால் மக்கள் அச்சத்தில் உள்ளனர். மேலும் தடுப்பூசி செலுத்தும் பணி விரைவுபடுத்தப்பட்டுள்ளது. இதனையடுத்து தமிழகத்தில் கூடுதல் கட்டுப்பாடுகளை அமல்படுத்த தமிழக அரசு அறிவித்துள்ளது. அதன்படி, தமிழகத்தில் இரவு 10 மணி முதல் காலை 5 மணி வரை இரவு நேர ஊரடங்கு அமலுக்கு வந்துள்ளது. மேலும் ஞாயிறு அன்று முழு ஊரடங்கு அமல்படுத்தப்பட்டு வருகிறது.
ஏற்கனவே ஜனவரி 9 மற்றும் 16- ஆம் தேதிகளில் முழு ஊரடங்கு அமல்படுத்தப்பட்டிருந்த நிலையில், தற்போது தொடர்ந்து 3-வது முறையாக இன்று முழு ஊரடங்கு அமல்படுத்தப்பட்டுள்ளது. ஞாயிறு ஊரடங்கின் போது, அரசு மற்றும் தனியார் பேருந்து, கோவில்கள், காய்கறி, பலசரக்கு கடைகள், ஆகியவற்றுக்கு தடை விதிக்கப்பட்டுள்ளது. இதன் தொடர்ச்சியாக முழு ஊரடங்கான இன்று தமிழகத்தில் அனைத்து மாவட்டங்களிலும் உள்ள அரசு மதுபானக் கடைகளும், மதுபான கடைகளுடன் இயங்கும் மதுபான கூடங்களும் மூடப்பட்டிருக்கும். இவற்றை அந்தந்த மாவட்ட டாஸ்மாக் நிர்வாகங்கள் உறுதி செய்ய வேண்டும் என்று டாஸ்மாக் நிர்வாக மேலாளர் அனுப்பியுள்ள சுற்றறிக்கையில் கூறப்பட்டுள்ளது.