தமிழ்நாடு அரசுப் பணியாளர் தேர்வாணையம் (டிஎன்பிஎஸ்சி) மூலம் அரசு அலுவலகங்களில் காலியாக உள்ள பணியிடங்கள் நிரப்பபடுகின்றன. இந்த அடிப்படையில் குரூப் 1, குரூப் 2, குரூப் 4 தேர்வுகளை டிஎன்பிஎஸ்சி நடத்தி வருகிறது. கொரோனா பரவல் காரணமாக ஒன்றரை வருடமாக டிஎன்பிஎஸ்சி குறித்து எந்த வேலைவாய்ப்பு அறிவிப்பும் வெளியாகவில்லை. இதனால் பலரும் வேலைவாய்ப்பு இன்றி அவதிப்பட்டனர். இதையடுத்து கொரோனா குறைந்ததன் காரணமாக தற்போது 2021ஆம் ஆண்டு பிப்ரவரி மற்றும் மார்ச் மாதங்களில் குரூப் 2 மற்றும் குரூப் 4 தேர்வுகளுக்கான அறிக்கை வெளியிடப்பட உள்ளதாக டிஎன்பிஎஸ்சி தெரிவித்துள்ளது.
அதுமட்டுமல்லாமல் டிஎன்பிஎஸ்சி தேர்வு முறைகள், பாடத்திட்டங்களில் செய்யப்பட்டுள்ள மாற்றங்கள் போன்றவை தொடர்பாக தேர்வாணையமானது அறிவிப்பு வெளியிட்டுள்ளது. டிஎன்பிஎஸ்சி தேர்வுகளில் ஆங்கில மொழித்தாள் நீக்கப்பட்டு தமிழ் மொழி தகுதித் தேர்வு கட்டாயமாக்கப்பட்டுள்ளது. இந்த வகையில் தமிழ் மொழி தகுதித் தேர்வில் 40 சதவீதம் மதிப்பெண்கள் பெற வேண்டும் என குறிப்பிடப்பட்டுள்ளது. இதனிடையில் டிஎன்பிஎஸ்சி தேர்வுக்கு தயாராகி வருபவர்களுக்கு ஒரு சந்தேகம் எழுந்துள்ளது. என்னவென்றால் பழைய படத்தித்தின் மூலமாக தேர்வு நடை பெறுமா…? அல்லது புதியதாக பாடத்திட்டம் வெளியிடப்படுமா…? என்ற கேள்வி எழுந்தது.
இது தொடர்பாக விளக்கம் அளித்துள்ள டிஎன்பிஎஸ்சி, தேர்வுக்கு தயாராகும் மாணவர்கள் கவலைகொள்ள வேண்டாம் என்று கேட்டுக் கொண்டுள்ளது. புதிய பாடத்திட்டம் அடிப்படையில் தான் தேர்வு நடைபெறும் என்று டிஎன்பிஎஸ்சி அறிவித்துள்ளது. மேலும் குரூப் 4 VAO தேர்வுக்கான புதிய பாடத்திட்டம் மற்றும் மாதிரி வினாத்தாள் டிஎன்பிஎஸ்சி அதிகாரபூர்வ இணையதளத்தில் (https://www.tnpsc.gov.in/English/new_syllabus.html) வெளியிடப்பட்டுள்ளது. ஆகவே டிஎன்பிஎஸ்சி தேர்வுக்கு தயாராகி வருவோர் இணையதளத்திற்கு சென்று பாடத்திட்டகளை பார்த்து பயனடையலாம்.