சுற்றுலா வேன் கட்டுபாட்டை இழந்து தடுப்பு சுவர் மீது மோதி கவிழ்ந்ததில் டிரைவர் உயிரிழந்த நிலையில் 17 பேர் படுகாயமடைந்துள்ளனர்.
மதுரை மாவட்டம் உசிலம்பட்டி பகுதியில் தர்சன் என்ற வாலிபர் வசித்து வந்துள்ளனர். இந்நிலையில் தனது பாட்டிக்கு திதி கொடுப்பதற்காக உறவினர்களுடன் ராமேஸ்வரத்திற்கு வேனில் சென்றுள்ளார். இதனையடுத்து நள்ளிரவு சமயத்தில் வேன் பரமக்குடி அருகே சென்று கொண்டிருந்த போது வேன் டிரைவருக்கு திடீரென வலிப்பு ஏற்பட்டுள்ளது.இதனால் வேன் கட்டுபாட்டை இழந்து சாலையில் இருந்த தடுப்புசுவர் மீது மோதி வேன் கவிழ்ந்துள்ளது.
இந்த கோர விபத்தில் வேன் டிரைவர் அனுமார் பட்டியை சேர்ந்த வீரபாண்டி என்பவர் சம்பவ இடத்திலேயே ரத்த வெள்ளத்தில் பரிதாபமாக உயிரிழந்துள்ளார். இதனைதொடர்ந்து வேனில் இருந்த 17 பேரும் படுகாயம் அடைந்துள்ளனர். மேலும் தகவலறிந்து சென்ற காவல்துறையினர் காயமடைந்தவர்களை மீட்டு அரசு மருத்துவமனைக்கு அனுப்பி வைத்துள்ளனர். இதுகுறித்து காவல்துறையினர் வழக்குபதிவு செய்து விசாரித்து வருகின்றனர்.