6-வது டி.என்.பி.எல். 20 ஓவர் கிரிக்கெட் போட்டியானது சென்ற 23ஆம் தேதி நெல்லையில் துவங்கியது. அங்கு 6 ஆட்டங்கள் நடைபெற்றது. இதையடுத்து திண்டுக்கல்லில் 7 போட்டிகள் மற்றும் கோவையில் 8 ஆட்டங்கள் நடை பெற்றது. இதுவரையிலும் 21 லீக் ஆட்டங்கள் முடிந்துள்ளது. நெல்லை ராயல் கிங்ஸ் 6 வெற்றியுடன் 12 புள்ளிகள் பெற்று பிளேஆப் சுற்றுக்கு முன்னேறி இருக்கிறது. அதன்பின் மதுரை பாந்தர்ஸ் 4 வெற்றி, ஒரு தோல்வியுடன் 8 புள்ளியும், கோவை கிங்ஸ் 3 வெற்றி, 3 தோல்வியுடன் 6 புள்ளியும் , சேப்பாக் சூப்பர்கில்லீஸ் 3 வெற்றி, 2 தோல்வியுடன் 6 புள்ளியும் பெற்றுள்ளது. அதேபோன்று திண்டுக்கல் டிராகன்ஸ் (2 வெற்றி, 4 தோல்வி), திருப்பூர் தமிழன்ஸ் (2 வெற்றி, 3 தோல்வி) அணிகள் தலா 4 புள்ளிகளுடன் இருக்கிறது.
திருச்சி வாரியர்ஸ் 2 புள்ளி (1 வெற்றி, 4 தோல்வி) பெற்றுள்ளது குறிப்பிடத்தக்கது. சேலம் ஸ்பார்டன்ஸ் தான் மோதிய 4 ஆட்டங்களிலுமே தோற்று புள்ளி எதுவும் பெறவில்லை. 2 நாள் இடைவெளிக்கு பின் சேலம் கிரிக்கெட் பவுண்டேசன் மைதானத்தில் டி.என்.பி.எல். போட்டிகள் நாளை ( 19ம் தேதி ) துவங்குகிறது. கோவையை போன்று சேலத்திலும் முதன் முறையாக டி .என். பி எல். ஆட்டங்கள் நடைபெறுகிறது. இதில் சேலத்தில் நாளை இரவு 7:15 மணிக்கு நடைபெறும் ஆட்டத்தில் கவுசிக்காந்தி தலைமையிலான சேப்பாக் சூப்பர் கில்லீஸ்- முருகன் அஸ்வின் தலைமையிலான சேலம் ஸ்பார்டன்ஸ் அணிகள் மோதுகிறது.
நடப்பு சாம்பியனான சேப்பாக் சூப்பர்கில்லீஸ் முதல் 2 ஆட்டத்தில் தோற்றது. அதன்பின் தொடர்ந்து 3 போட்டியில் வெற்றிபெற்றது. அந்த அணியானது சேலம் ஸ்பார்டன்சை வீழ்த்தி 4வது வெற்றியை பெறும் ஆர்வத்தில் இருக்கிறது. சேப்பாக் சூப்பர் கில்லீஸ் அணியில் கேப்டன் கவுசிக்காந்தி, ஜெகதீசன், சசிதேவ், ராதாகிருஷ்ணன், சாய் கிஷோர், அலெக்சாண்டர், ஹரிஷ் குமார் ஆகிய சிறந்த வீரர்கள் இருக்கின்றனர். 4ஆட்டத்தில் தோல்வியடைந்த சேலம் ஸ்பார்டன்ஸ் முதல் வெற்றிக்காக காத்திருக்கிறது. சொந்த மண்ணில் ஆடுவது கூடுதல் பலத்தைதரும் என அந்த அணி நம்பிக்கையில் உள்ளது.