தடுப்புச்சுவர் மீது மோட்டார் சைக்கிள் மோதிய விபத்தில் கல்லூரி மாணவர் பலியான சம்பவம் சோகத்தை ஏற்படுத்தியுள்ளது.
விருதுநகர் மாவட்டத்திலுள்ள காரியாபட்டியில் இருக்கும் தனியார் பொறியியல் கல்லூரியில் காதர் உசேன் என்பவர் படித்து வருகிறார். இந்நிலையில் காதர் இரவு நேரத்தில் தனது நண்பர்களை பார்த்து விட்டு மீண்டும் மோட்டார் சைக்கிளில் வீட்டிற்கு புறப்பட்டுள்ளார். இவர் மதுரை-தூத்துக்குடி தேசிய நெடுஞ்சாலை கல்லுப்பட்டி விலக்கு அருகே சென்று கொண்டிருந்தபோது காதரின் மோட்டார் சைக்கிள் சாலையின் தடுப்பு சுவர் மீது பலமாக மோதியது.
இந்த விபத்தில் படுகாயமடைந்த காதர் சம்பவ இடத்திலேயே பரிதாபமாக உயிரிழந்துவிட்டார். இதுகுறித்து தகவல் அறிந்த காவல்துறையினர் சம்பவ இடத்திற்கு விரைந்து சென்று மாணவரின் சடலத்தை கைப்பற்றி அரசு மருத்துவமனைக்கு அனுப்பி வைத்துள்ளனர். மேலும் இதுகுறித்து வழக்குப்பதிவு செய்த காவல்துறையினர் விசாரணை மேற்கொண்டு வருகின்றனர்.