மூதாட்டியை கட்டிப்போட்டு பணம் மற்றும் நகையை திருடி சென்ற இரண்டு மர்ம நபர்களை போலீசார் தீவிரமாக தேடி வருகின்றனர்.
கோயம்புத்தூர் மாவட்டத்தில் உள்ள பெரியநாயக்கன்பாளையம் ஹவுசிங் யூனிட் பகுதியில் விவசாய சுப்பிரமணி(77) என்பவர் வசித்து வருகிறார். இவருக்கு சுப்பாத்தாள்(59) என்ற மனைவி உள்ளார். இவர்கள் ஆடு மாடுகளை வளர்த்து அதன் மூலம் பால் வியாபாரம் செய்து வருகின்றனர். நேற்று மதியம் 2 மர்ம நபர்கள் மூதாட்டியின் வீட்டிற்கு சென்று குடிப்பதற்கு தண்ணீர் தாருங்கள் என கேட்டனர். இதனால் தண்ணீர் கொண்டு வருவதற்காக மூதாட்டி வீட்டிற்குள் சென்றபோது மர்ம நபர்கள் அவரை பின்தொடர்ந்து சென்றுள்ளனர்.
இதனை அடுத்து 2 பேரும் மூதாட்டியின் வாய், கை, கால்களை வேஷ்டியால் கட்டிப்போட்டு பீரோவில் இருந்த 10,000 ரூபாய் பணம், 8 பவுன் தங்க சங்கிலி, 2 தங்கம் மோதிரம் ஆகியவற்றை திருடிவிட்டு அங்கிருந்து தப்பியோட முயற்சி செய்தனர். அந்த சமயம் சுப்பிரமணி வீட்டிற்குள் வந்ததால் அதிர்ச்சியடைந்த மர்ம நபர்கள் அவரை கீழே தள்ளிவிட்டு தப்பி ஓடினர். இதுகுறித்த புகாரின் பேரில் வழக்கு பதிவு செய்த போலீசார் கண்காணிப்பு கேமரா காட்சிகளின் அடிப்படையில் மர்ம. நபர்களை தீவிரமாக தேடி வருகின்றனர்.